નવી દિલ્હી, 11 જૂન (હિ.સ.)। તૃણમૂલ કોંગ્રેસ (ટીએમસી)ને, ગુરુવારે વધુ એક રાજકીય ઝટકો લાગ્યો જ્યારે પાર્ટીના રાજ્યસભા સાંસદ પ્રકાશ ચિક બડાઈકે ઉચ્ચ સદનની સભ્યતા પરથી રાજીનામું આપી દીધું. તેમણે પોતાનું રાજીનામું રાજ્યસભા સચિવાલયને સોંપીને તેને તાત્કાલિક અસરથી સ્વીકારવાની વિનંતી કરી છે.

પોતાના રાજીનામા પત્રમાં બડાઈકે લખ્યું છે, “હું રાજ્યસભાની સભ્યતા પરથી રાજીનામું આપું છું, જેને તાત્કાલિક અસરથી સ્વીકારવામાં આવે. હું ઉપસભાપતિ તેમજ રાજ્યસભા સચિવાલયના તમામ અધિકારીઓ અને કર્મચારીઓનો મારા કાર્યકાળ દરમિયાન મળેલા સહયોગ અને સહાય માટે હાર્દિક આભાર વ્યક્ત કરું છું.”

જોકે, તેમણે પોતાના રાજીનામા પાછળ કોઈ ખાસ કારણનો ઉલ્લેખ કર્યો નથી. હવે રાજ્યસભા સચિવાલય દ્વારા રાજીનામા સંબંધિત બંધારણીય અને પ્રક્રિયાત્મક ઔપચારિકતાઓ પૂર્ણ કરવામાં આવશે.

ઉલ્લેખનીય છે કે, છેલ્લા કેટલાક સમયથી તૃણમૂલ કોંગ્રેસના અનેક વરિષ્ઠ નેતાઓએ પાર્ટી અને પોતાના સંસદીય પદોથી રાજીનામા આપ્યા છે. આ પહેલાં સાંસદ સુષ્મિતા દેવ અને સુખેન્દુ શેખર રોય પણ રાજ્યસભાની સભ્યતા અને પાર્ટીમાંથી રાજીનામું આપી ચૂક્યા છે.

પ્રકાશ ચિક બડાઈકના રાજીનામા બાદ રાજ્યસભામાં તૃણમૂલ કોંગ્રેસની સંખ્યા ઘટીને 10 સાંસદો સુધી પહોંચી ગઈ છે. તેમના આ પગલાને લઈને રાજકીય વર્તુળોમાં ચર્ચાઓ શરૂ થઈ ગઈ છે, જોકે પાર્ટી તરફથી હજુ સુધી આ મુદ્દે કોઈ સત્તાવાર પ્રતિક્રિયા સામે આવી નથી.

હિન્દુસ્થાન સમાચાર / વિજયાલક્ષ્મી / અમરેશ દ્વિવેદી

હિન્દુસ્થાન સમાચાર / ડો.હિતેશ એન.વ્યાસ