કચ્છ, 11 જૂન (હિ.સ.) : પશ્ચિમ કચ્છ જિલ્લામાં ગેરકાયદેસર દારૂના વેપાર સામે પોલીસ દ્વારા સતત કડક કાર્યવાહી હાથ ધરવામાં આવી રહી છે. આ જ અભિયાનના ભાગરૂપે ભારતીય બનાવટના વિદેશી દારૂના ગેરકાયદેસર વેચાણમાં સંડોવાયેલા એક શખ્સ સામે પાસા (Prevention of Anti Social Activities Act) હેઠળ કાર્યવાહી કરીને તેને અટકાયતમાં લઈ અમદાવાદની મધ્યસ્થ જેલમાં મોકલી આપવામાં આવ્યો છે.
પશ્ચિમ કચ્છ પોલીસ અને જિલ્લા વહીવટી તંત્રના સંયુક્ત પ્રયાસોથી જિલ્લામાં અસામાજિક પ્રવૃત્તિઓ પર અંકુશ લાવવા માટે વિશેષ ઝુંબેશ ચલાવવામાં આવી રહી છે. પોલીસ વિભાગના ઉચ્ચ અધિકારીઓના માર્ગદર્શન હેઠળ કરવામાં આવેલી તપાસ દરમિયાન માંડવી તાલુકાના દરશડી ગામના રહેવાસી ભાવસંગજી ભગુભા જાડેજા લાંબા સમયથી દારૂના ગેરકાયદેસર વેપારમાં સંડોવાયેલા હોવાનું સામે આવ્યું હતું.
આરોપી સામે વિવિધ પોલીસ સ્ટેશનોમાં પ્રોહિબિશન એક્ટ હેઠળ અનેક ગુનાઓ નોંધાયેલા હોવાનું પોલીસ રેકોર્ડમાં બહાર આવ્યું હતું. ઉપરાંત જાહેર શાંતિ અને કાયદો-વ્યવસ્થા ભંગ થવાની શક્યતા ઊભી કરતી અન્ય પ્રવૃત્તિઓને ધ્યાનમાં રાખીને તેની સામે પાસા હેઠળ દરખાસ્ત તૈયાર કરવામાં આવી હતી. લોકલ ક્રાઇમ બ્રાન્ચના અધિકારીઓએ આરોપીની ગુનાહિત હિસ્ટ્રી અને ઉપલબ્ધ પુરાવાઓના આધારે તૈયાર કરેલી દરખાસ્ત જિલ્લા મેજિસ્ટ્રેટ સમક્ષ રજૂ કરી હતી.
દરખાસ્તની સમીક્ષા બાદ જિલ્લા મેજિસ્ટ્રેટે આરોપી સામે પાસા હેઠળ અટકાયતનો હુકમ આપ્યો હતો. ત્યારબાદ પશ્ચિમ કચ્છ લોકલ ક્રાઇમ બ્રાન્ચની ટીમે આરોપીને શોધી કાઢી કાયદેસરની કાર્યવાહી પૂર્ણ કરીને તેની અટકાયત કરી હતી. જરૂરી પ્રક્રિયા પૂર્ણ કર્યા બાદ તેને અમદાવાદ સ્થિત મધ્યસ્થ જેલમાં મોકલી આપવામાં આવ્યો છે.
પોલીસના જણાવ્યા મુજબ જિલ્લામાં દારૂના ગેરકાયદેસર વેપાર, અસામાજિક પ્રવૃત્તિઓ અને કાયદો-વ્યવસ્થાને ખલેલ પહોંચાડતા તત્વો સામે આવી જ રીતે કડક કાર્યવાહી આગળ પણ ચાલુ રહેશે. પોલીસ તંત્રનું માનવું છે કે, આવી કાર્યવાહીથી ગુનાહિત પ્રવૃત્તિઓ પર નિયંત્રણ આવશે અને સામાન્ય નાગરિકોમાં સુરક્ષાની ભાવના વધુ મજબૂત બનશે.
---------------
હિન્દુસ્થાન સમાચાર / Rohit Ramjibhai Padhiyar
