યુજિન (અમેરિકા), નવી દિલ્હી, 11 જૂન (હિ.સ.) અમેરિકાના યુવા એથ્લીટ જા’કોબે થાર્પે, ગુરુવારે એનસીએએ આઉટડોર ચેમ્પિયનશિપની હીટ સ્પર્ધામાં પુરુષોની 110 મીટર હર્ડલ્સ દોડમાં નવો વિશ્વ રેકોર્ડ સ્થાપ્યો.

ઓબર્ન યુનિવર્સિટીનું પ્રતિનિધિત્વ કરતા થાર્પે, 12.75 સેકન્ડનો સમય નોંધાવ્યો અને અગાઉનો વિશ્વ રેકોર્ડ પાછળ છોડી દીધો. આ પહેલાં આ રેકોર્ડ અમેરિકાના એરિઝ મેરિટના નામે હતો, જેમણે વર્ષ 2012માં 12.80 સેકન્ડનો સમય નોંધાવ્યો હતો.

વિશ્વ રેકોર્ડ બનાવ્યા બાદ થાર્પે કહ્યું, “મેં આવું કરવાની કોઈ યોજના બનાવી નહોતી. સાચું કહું તો મારો એવો કોઈ ઇરાદો નહોતો.”

પાંચમી લેનમાં દોડની શરૂઆત કરનાર 20 વર્ષીય થાર્પ શરૂઆતમાં થોડા ધીમા દેખાયા હતા, પરંતુ ત્રીજી અડચણ પાર કર્યા બાદ તેમણે આગેવાની મેળવી લીધી. ત્યારબાદ તેમણે શાનદાર ઝડપ પકડી અને જોરદાર અંદાજમાં દોડ પૂર્ણ કરી.

થાર્પે કહ્યું, “મને ખબર હતી કે આ સ્પર્ધા સુધી પહોંચતા પહોંચતા મારી તૈયારી ખૂબ સારી થઈ જશે, કારણ કે અમે ખાસ આ સ્પર્ધા માટે અમારી ફિટનેસને સર્વોચ્ચ સ્તરે પહોંચાડવાની યોજના બનાવી હતી. મને વિશ્વાસ હતો કે હું કંઈક અસાધારણ કરી શકું છું, ફક્ત તેને યોગ્ય રીતે અમલમાં મૂકવાની જરૂર હતી.”

થાર્પે આ પહેલાં વર્ષ 2024ની અંડર-20 વિશ્વ ચેમ્પિયનશિપમાં સ્વર્ણ પદક પણ જીત્યો હતો.

જોકે, થાર્પના આ વિશ્વ રેકોર્ડને હજુ સુધી વર્લ્ડ એથ્લેટિક્સની સત્તાવાર મંજૂરી મળવાની બાકી છે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / ડો.હિતેશ એન.વ્યાસ