વોશિંગ્ટન, નવી દિલ્હી, 11 જૂન (હિ.સ.)। પશ્ચિમ એશિયામાં વધતા તણાવ વચ્ચે અમેરિકાના રાષ્ટ્રપતિ ડોનાલ્ડ ટ્રમ્પે જાહેરાત કરી છે કે, ઇરાન વિરુદ્ધ પ્રસ્તાવિત સૈન્ય હુમલા અને બોમ્બમારો હાલ માટે સ્થગિત કરવામાં આવ્યો છે. ટ્રમ્પે જણાવ્યું કે ઇરાન સાથેની વાતચીત મહત્વપૂર્ણ તબક્કે પહોંચી ગઈ છે અને કરારના અનેક મુખ્ય મુદ્દાઓ પર સહમતિ બનવાની દિશામાં પ્રગતિ થઈ છે.

સોશિયલ મીડિયા પ્લેટફોર્મ ‘ટ્રુથ સોશિયલ’ પર જાહેર કરાયેલા પોતાના સંદેશમાં ટ્રમ્પે જણાવ્યું કે, ઇરાનના ટોચના નેતૃત્વ સાથે થયેલી ચર્ચાઓ બાદ તેમણે આયોજનબદ્ધ સૈન્ય કાર્યવાહી રદ કરવાનો નિર્ણય લીધો છે. તેમના જણાવ્યા અનુસાર, કરારની રૂપરેખા અને તે સાથે જોડાયેલા અનેક મહત્વપૂર્ણ મુદ્દાઓ પર સંબંધિત પક્ષો વચ્ચે વિસ્તૃત ચર્ચા થઈ ચૂકી છે.

ટ્રમ્પે જણાવ્યું કે આ પ્રક્રિયામાં અમેરિકા ઉપરાંત ઇઝરાયેલ, સાઉદી અરેબિયા, સંયુક્ત આરબ અમીરાત, કતાર, તુર્કિયે, પાકિસ્તાન, બહેરીન, કુવૈત, જોર્ડન અને ઇજિપ્ત સહિત અનેક દેશોની મહત્વપૂર્ણ ભૂમિકા રહી છે.

જો કે ટ્રમ્પે સ્પષ્ટ કર્યું કે, વિસ્તારમાં અમલમાં રહેલી નૌકાદળની નાકાબંધી હાલ યથાવત્ રહેશે અને અંતિમ કરાર પર ઔપચારિક હસ્તાક્ષર ન થાય ત્યાં સુધી તેમાં કોઈ છૂટછાટ આપવામાં આવશે નહીં. તેમણે સંકેત આપ્યો કે કરાર સંબંધિત આગામી જાહેરાતો ટૂંક સમયમાં કરવામાં આવી શકે છે.

આ દરમિયાન અમેરિકન સૈન્ય કમાન્ડ ‘યુએસ સેન્ટ્રલ કમાન્ડ’ (સેન્ટકોમ) એ હોર્મુઝ જળમાર્ગ અંગે મહત્વપૂર્ણ દાવો કર્યો છે. સેન્ટકોમના જણાવ્યા અનુસાર, હોર્મુઝ જળમાર્ગ આંતરરાષ્ટ્રીય વેપારી જહાજો માટે ખુલ્લો છે અને ત્યાં સુરક્ષિત સમુદ્રી માર્ગ ઉપલબ્ધ છે.

સેન્ટકોમે જણાવ્યું કે, જે જહાજો ઇરાન સંબંધિત અમેરિકી પ્રતિબંધોનું ઉલ્લંઘન કરતા નથી, તેઓ સામાન્ય રીતે આ માર્ગનો ઉપયોગ કરી શકે છે. અમેરિકી પક્ષનો દાવો છે કે છેલ્લા બે મહિનામાં સેંકડો વાણિજ્યિક જહાજો સુરક્ષિત રીતે હોર્મુઝ જળમાર્ગમાંથી પસાર થયા છે.

હિન્દુસ્થાન સમાચાર / આકાશ કુમાર રાય / પ્રભાત મિશ્ર

હિન્દુસ્થાન સમાચાર / ડો.હિતેશ એન.વ્યાસ