જામનગર, 15 જૂન (હિ.સ.) જામનગર જિલ્લાના કાલાવડ ગ્રામ્ય પોલીસ સ્ટેશન વિસ્તારમાં ખંઢેરા ગામની સીમમાં ફુલઝર-1 નદીના પટ્ટ વિસ્તારમાંથી કોપર વાયરની ચોરીના વણશોધાયેલા ગુનાનો કાલાવડ ગ્રામ્ય પોલીસે ગણતરીના કલાકોમાં ભેદ ઉકેલી બે આરોપીઓને ઝડપી પાડી ચોરીમાં ગયેલો તમામ મુદ્દામાલ કબજે કર્યો છે.

કાલાવડ ગ્રામ્ય પોલીસ સ્ટેશનમાં બી.એન.એસ. કલમ 303(2) હેઠળ નોંધાયેલા ગુનામાં અજાણ્યા શખ્સો ખંઢેરા ગામની ઢુકડી વાડી સીમ વિસ્તારમાં ખેડૂતોએ પાણીની મોટરમાં લગાવેલા અંદાજે 630 ફૂટ કોપર વાયર રાત્રિના સમયે ચોરી કરી લઈ ગયા હતા.જે ગુનાનો ભેદ ઉકેલવા માટે પોલીસ ઇન્સ્પેક્ટર એન.વી. આંબલિયાના માર્ગદર્શન હેઠળ અલગ-અલગ ટીમો બનાવી તપાસ હાથ ધરવામાં આવી હતી. તપાસ દરમિયાન પોલીસ હેડ કોન્સ્ટેબલ વી.જે. જાદવ વગેરેને મળેલી ખાનગી બાતમીના આધારે વરૂડી માતાજીના પાટિયા પાસે આવેલા પાણીના ટાંકા પાછળ નદીના વોકળામાં દરોડો પાડ્યો હતો ત્યાં બે શખ્સો ધીરુભાઈ ઉર્ફે બંસી મનજીભાઈ વાઘેલા ખંઢેરા સીમ, વરૂડી માતાના પાટિયા પાસે, તા. કાલાવડ, તેમજ પિન્ટુ મુકેશભાઈ પરમાર જામનગર, હાલ રહે. ખંઢેરા સીમ, વરૂડી માતાના પાટિયા પાસે, તા. કાલાવડ, જી. જામનગર. ચોરી કરેલો કોપર કેબલ સળગાવી રહ્યા હોવાનું જણાતા પોલીસે બંનેને ઝડપી લીધા હતા. તેમની પાસેથી ચોરી કરેલો તમામ કોપર કેબલ તેમજ ચોરીમાં ઉપયોગમાં લેવામાં આવેલી મોટરસાયકલ અને કુહાડો કબજે કરવામાં આવ્યા હતા.

હિન્દુસ્થાન સમાચાર / Dhaval Nilesh bhai bhatt