જામનગર, 15 જૂન (હિ.સ.) જામનગર નજીક બાલાચડી બીચ વિસ્તારમાં દરિયામાં ડૂબી જવાથી એક વ્યક્તિનું કરુણ મોત નિપજ્યું હોવાની ઘટના સામે આવી છે.પ્રાપ્ત વિગતો મુજબ જામનગરના મચ્છીપીઠ વિસ્તારના રહેવાસી સલીમ અબાસભાઈ જખરા પોતાના ઘરેથી ફરવા જવાનું કહી નીકળ્યા હતા. ત્યારબાદ તેઓ બાલાચડી બીચ પાસે આવેલા દરિયામાં નહાવા પડ્યા હતા. આ દરમિયાન તેઓ અકસ્માતે ગારા-કીચડમાં ફસાઈ જતાં અને દરિયાના પાણીમાં ડૂબી જતાં ગંભીર સ્થિતિ સર્જાઈ હતી.ઘટનાની જાણ થતાં તાત્કાલિક 108 એમ્બ્યુલન્સને બોલાવવામાં આવી હતી, પરંતુ ફરજ પરના તબીબે તપાસ કરતાં સલીમ જખરાનું મૃત્યુ થયાનું જાહેર કર્યું હતું.આ બનાવ અંગે બેડી મરીન પોલીસ સ્ટેશનમાં બી.એન.એસ.એસ. કલમ 194 મુજબ અકસ્માત મોતનો દાખલો નોંધવામાં આવ્યો છે. પોલીસે આગળની કાર્યવાહી હાથ ધરી છે.

હિન્દુસ્થાન સમાચાર / Dhaval Nilesh bhai bhatt