બોટાદ, 16 જૂન (હિ.સ.)બોટાદ જિલ્લાના રાણપુર ખાતે, જિલ્લા મહિલા અને બાળ અધિકારી કચેરી દ્વારા “કાયદાકીય જાગૃતિ તથા મહિલાલક્ષી યોજનાઓ અંગે જાગૃતિ” કાર્યક્રમનું આયોજન કરવામાં આવ્યું હતું. કાર્યક્રમનો મુખ્ય હેતુ મહિલાઓને તેમના કાયદાકીય અધિકારો અંગે માહિતગાર કરવા તેમજ સરકાર દ્વારા, અમલમાં મૂકવામાં આવતી વિવિધ મહિલાલક્ષી યોજનાઓની જાણકારી પહોંચાડવાનો હતો.

કાર્યક્રમમાં મોટી સંખ્યામાં મહિલાઓ, યુવતીઓ તેમજ સ્થાનિક આગેવાનો ઉપસ્થિત રહ્યા હતા. જિલ્લા મહિલા અને બાળ વિકાસ વિભાગના અધિકારીઓએ મહિલાઓને તેમના હક્કો, કાયદાકીય સુરક્ષા અને વિવિધ સહાયકારી વ્યવસ્થાઓ વિશે વિગતવાર માર્ગદર્શન આપ્યું હતું. મહિલાઓ સામે થતા ઘરેલુ હિંસા, બાળલગ્ન, દહેજ પ્રથા, મહિલાઓ પર થતા અત્યાચાર અને મહિલા સુરક્ષા સંબંધિત કાયદાઓ અંગે પણ વિસ્તૃત માહિતી આપવામાં આવી હતી.

આ ઉપરાંત સરકાર દ્વારા મહિલાઓના સશક્તિકરણ માટે અમલમાં મૂકવામાં આવતી વિવિધ યોજનાઓ જેવી કે મહિલા સ્વાવલંબન યોજનાઓ, સખી વન સ્ટોપ સેન્ટર, મહિલા હેલ્પલાઇન-181, પોષણ અભિયાન, બેટી બચાવો-બેટી ભણાવો સહિતની યોજનાઓ અંગે માહિતી આપવામાં આવી હતી. ઉપસ્થિત મહિલાઓને યોજનાઓનો લાભ કેવી રીતે મેળવવો અને અરજી પ્રક્રિયા અંગે પણ માર્ગદર્શન આપવામાં આવ્યું હતું.

કાર્યક્રમ દરમિયાન મહિલાઓના પ્રશ્નો સાંભળી તેના યોગ્ય નિરાકરણ માટે જરૂરી સૂચનો આપવામાં આવ્યા હતા. નિષ્ણાતો દ્વારા મહિલાઓને આત્મનિર્ભર બનવા, શિક્ષણ અને રોજગારી તરફ આગળ વધવા તેમજ પોતાના અધિકારો માટે જાગૃત રહેવા પ્રેરણા આપવામાં આવી હતી.

જિલ્લા મહિલા અને બાળ અધિકારી કચેરી દ્વારા આયોજિત આ કાર્યક્રમ, મહિલાઓમાં કાયદાકીય જાગૃતિ વધારવા અને સરકારની કલ્યાણકારી યોજનાઓનો લાભ વધુને વધુ મહિલાઓ સુધી પહોંચાડવા માટે મહત્વપૂર્ણ સાબિત થયો હતો. ઉપસ્થિત મહિલાઓએ કાર્યક્રમને ઉપયોગી ગણાવી આવા જાગૃતિ કાર્યક્રમો વધુ પ્રમાણમાં યોજવાની માંગ વ્યક્ત કરી હતી.

---------------

હિન્દુસ્થાન સમાચાર / DISHANT NANDRAMBHAI GONADLIYA