બેંગલુરુ, 16 જૂન (હિ.સ.). રાષ્ટ્રીય સ્વયંસેવક સંઘ (આરએસએસ)ને લઈને કોંગ્રેસના નેતાઓ દ્વારા કરવામાં આવી રહેલી ટિપ્પણીઓ પર કડક પ્રતિક્રિયા વ્યક્ત કરતાં કર્ણાટક વિધાનસભામાં વિપક્ષના નેતા આર. અશોકે કહ્યું છે કે, દેશભક્ત સંસ્થા આરએસએસની રાષ્ટ્રનિષ્ઠા પર સવાલ ઉઠાવવાનો નૈતિક અધિકાર કોંગ્રેસ પાસે નથી. અશોકે એક્સ પર કહ્યું કે, દેશના વિભાજન માટે જવાબદાર મુસ્લિમ લીગ જેવી સંસ્થાઓ સાથે રાજકીય ગઠબંધન કરનાર કોંગ્રેસ માટે આરએસએસ પર ટિપ્પણી કરવી વિસંગત છે. તેમણે આરોપ લગાવ્યો કે, કોંગ્રેસે પહેલા પોતાના રાજકીય ઇતિહાસ પર આત્મમંથન કરવું જોઈએ.

અશોકે વિધાનસૌધાના સામે કથિત ‘પાકિસ્તાન જિંદાબાદ’ નારા લગાવવાની ઘટનાનો ઉલ્લેખ કરતાં કહ્યું કે, તે સમયે રાજ્ય સરકાર અને મંત્રી પ્રિયંક ખર્ગે દ્વારા યોગ્ય કાર્યવાહી કરવામાં આવી નહોતી. તેમણે આરોપ લગાવ્યો કે, દેશવિરોધી માનસિકતા ધરાવનારાઓનું સમર્થન કરનાર લોકો હવે આરએસએસની વૈધતા અને રાષ્ટ્રસેવા પર પ્રશ્ન ઉઠાવી રહ્યા છે, જે દુર્ભાગ્યપૂર્ણ છે.

વિપક્ષના નેતાએ કહ્યું કે, કોંગ્રેસમાં આગામી મુખ્યમંત્રી પદના સંભવિત દાવેદારો વચ્ચે સ્પર્ધા ચાલી રહી છે અને પ્રિયંક ખડગે પાર્ટી નેતૃત્વનું ધ્યાન આકર્ષવા માટે આરએસએસનો મુદ્દો ઉઠાવી રહ્યા છે. તેમના અનુસાર, વર્ષ 2028ના વિધાનસભા ચૂંટણીને ધ્યાનમાં રાખીને રાજકીય વ્યૂહરચના હેઠળ આ પ્રકારના નિવેદનો આપવામાં આવી રહ્યા છે. અશોકે આરોપ લગાવ્યો કે માહિતી પ્રૌદ્યોગિકી, ગ્રામ્ય વિકાસ સહિત વિવિધ વિભાગોની જવાબદારીઓના નિર્વહમાં પ્રિયંક ખર્ગે નિષ્ફળ રહ્યા છે.

હિન્દુસ્થાન સમાચાર / રાકેશ એમ.બી. / મુકુંદ

હિન્દુસ્થાન સમાચાર / માધવી વ્યાસ