મહેસાણા, 16 જૂન (હિ.સ.)મહેસાણા મ્યુનિસિપલ કોર્પોરેશન દ્વારા નાગરિકોને વિવિધ સરકારી યોજનાઓ અને સેવાઓનો લાભ સરળતાથી મળી રહે તે હેતુથી જનકલ્યાણ શિબિરનું આયોજન કરવામાં આવ્યું હતું. શિબિરમાં વિવિધ વિભાગોની સેવાઓ એક જ સ્થળે ઉપલબ્ધ કરાવવામાં આવતા મોટી સંખ્યામાં નાગરિકોએ ઉપસ્થિત રહી તેનો લાભ લીધો હતો.
શિબિર દરમિયાન સરકારની જનહિતલક્ષી અને કલ્યાણકારી યોજનાઓ અંગે નાગરિકોને વિગતવાર માહિતી આપવામાં આવી હતી. વિવિધ યોજનાઓ માટે જરૂરી દસ્તાવેજો, પાત્રતા અને અરજી પ્રક્રિયા અંગે માર્ગદર્શન આપવામાં આવ્યું હતું. સાથે જ નાગરિકોની અરજીઓ સ્વીકારી સ્થળ પર જ જરૂરી કાર્યવાહી હાથ ધરવામાં આવી હતી.
આ પ્રસંગે અધિકારીઓએ જણાવ્યું હતું કે જનકલ્યાણ શિબિરનો મુખ્ય ઉદ્દેશ્ય સરકારી સેવાઓને નાગરિકો સુધી સરળતાથી પહોંચાડવાનો અને લોકોને વિવિધ યોજનાઓનો મહત્તમ લાભ મળે તે સુનિશ્ચિત કરવાનો છે. શિબિરમાં આવકના દાખલા, વિવિધ પ્રમાણપત્રો, કલ્યાણકારી યોજનાઓ તેમજ અન્ય નાગરિકલક્ષી સેવાઓ અંગે માહિતી અને સહાય પૂરી પાડવામાં આવી હતી.
નાગરિકોએ પણ આ પહેલને આવકારી હતી અને એક જ સ્થળે વિવિધ સેવાઓ ઉપલબ્ધ થવાથી સમય અને ખર્ચની બચત થતી હોવાનું જણાવ્યું હતું. શિબિર સફળતાપૂર્વક પૂર્ણ થતાં મોટી સંખ્યામાં લાભાર્થીઓને સીધો લાભ મળ્યો હતો.
---------------
હિન્દુસ્થાન સમાચાર / RINKU AMITKUMAR THAKOR
19 Jun 2026