કાઠમંડુ, નવી દિલ્હી, 16 જૂન (હિ.સ.) નેપાળમાં ચીનના સહયોગથી ચાલી રહેલી યોજનાઓમાં ઝડપ આવવાની આશા છે. રવિવારે ચાર દિવસીય પ્રવાસે ચીન પહોંચેલા નેપાળના વિદેશમંત્રી શિશિર ખનાલે સોમવારે પોતાના ચીની સમકક્ષ વાંગ યી સાથે દ્વિપક્ષીય વાટાઘાટો કરી. નેપાળના વિદેશ મંત્રાલયના નિવેદન અનુસાર, આ દરમિયાન ચીને અગાઉ સહમત થયેલી યોજનાઓમાં ઝડપ લાવવાનો આશ્વાસન આપ્યું.

બન્ને દેશોના પ્રતિનિધિમંડળો વચ્ચે આધારભૂત માળખાના વિકાસ, સંપર્ક અને કનેક્ટિવિટી, સરહદ વ્યવસ્થાપન, ઊર્જા, વેપાર, રોકાણ, કૃષિ, ટેકનોલોજી હસ્તાંતરણ, માહિતી પ્રૌદ્યોગિકી અને ડિજિટલીકરણ, પર્યટન, રાસાયણિક ખાતર, પેટ્રોલિયમ તથા કુદરતી ગેસ અન્વેષણ અને જનસ્તરનાં સંબંધોને વધુ મજબૂત બનાવવા જેવા વિષયો પર વિસ્તૃત ચર્ચા થઈ. ચીને નેપાળ સરકારને સુશાસન અને આર્થિક વિકાસની પ્રાથમિકતાઓમાં સંપૂર્ણ સહયોગ આપવાની પ્રતિબદ્ધતા પણ ફરી દોહરાવી.

નેપાળે સ્પષ્ટ કર્યું કે, તે પોતાની જમીનનો ઉપયોગ ચીન વિરોધી પ્રવૃત્તિ માટે થવા દેશે નહીં. તેના જવાબમાં ચીને નેપાળની સંપ્રભુતા, ભૌગોલિક અખંડિતતા અને સ્વતંત્રતા પ્રત્યે પોતાના દૃઢ સમર્થન અને સન્માનને ફરી વ્યક્ત કર્યું. સાથે જ, સુશાસન અને આર્થિક વિકાસના એજન્ડામાં શક્ય તેટલો સહયોગ આપવાનો આશ્વાસન પણ આપ્યું. દ્વિપક્ષીય વાટાઘાટો બાદ વિદેશમંત્રી વાંગ યીએ ખનાલના સન્માનમાં રાત્રિભોજનનું આયોજન કર્યું.

હિન્દુસ્થાન સમાચાર / પંકજ દાસ / મુકુંદ

હિન્દુસ્થાન સમાચાર / ડો.હિતેશ એન.વ્યાસ