ભાવનગર,17 જૂન (હિ.સ.)ભાવનગર જિલ્લાના ગારિયાધાર તાલુકાના ડમરાળા ગામની પ્રાથમિક શાળાના કેટલાક વર્ગખંડોની હાલત અત્યંત જર્જરિત બની ગઈ હોવાના આક્ષેપો સામે આવ્યા છે. શાળાની ઇમારતના રૂમોમાં દિવાલોમાં તિરાડો પડી ગઈ છે, છતમાંથી પોપડા ખરતા જોવા મળે છે તેમજ કેટલાક ભાગોમાં બાંધકામ નબળું પડી ગયું હોવાનું ગ્રામજનો જણાવી રહ્યા છે. તેમ છતાં વિદ્યાર્થીઓને આ રૂમોમાં બેસાડી અભ્યાસ કરાવવામાં આવતો હોવાને કારણે વાલીઓમાં ચિંતા વ્યાપી છે.

ગ્રામજનોના જણાવ્યા મુજબ વરસાદી મોસમ દરમિયાન શાળાની ઇમારત વધુ જોખમી બની જાય છે. છતમાંથી પાણી ટપકવાની સમસ્યા ઉપરાંત કોઈ પણ સમયે દિવાલ કે છતનો ભાગ તૂટી પડવાની ભીતિ રહે છે. આવી સ્થિતિમાં નાનાં બાળકોના જીવને જોખમ ઊભું થઈ શકે છે. વાલીઓ અને ગામલોકોએ અનેક વખત સંબંધિત તંત્રનું ધ્યાન દોર્યું હોવાનો દાવો કર્યો છે, પરંતુ હજુ સુધી સમસ્યાનું કાયમી નિરાકરણ આવ્યું નથી.

શાળામાં અભ્યાસ કરતા વિદ્યાર્થીઓ માટે સુરક્ષિત વાતાવરણ ઉપલબ્ધ કરાવવાની જવાબદારી શિક્ષણ વિભાગ અને સ્થાનિક તંત્રની છે. જર્જરિત રૂમોમાં અભ્યાસ કરાવવો એ ગંભીર બાબત ગણાય છે. વાલીઓએ માંગ કરી છે કે જોખમી રૂમોને તાત્કાલિક બંધ કરીને વિદ્યાર્થીઓને વૈકલ્પિક વ્યવસ્થા હેઠળ ભણાવવામાં આવે અને નવી ઇમારતના નિર્માણ અથવા જરૂરી મરામતની કામગીરી વહેલી તકે હાથ ધરવામાં આવે.

ગ્રામજનોનું કહેવું છે કે શિક્ષણની સાથે વિદ્યાર્થીઓની સુરક્ષા પણ એટલી જ મહત્વપૂર્ણ છે. જો સમયસર યોગ્ય પગલાં લેવામાં નહીં આવે તો કોઈ દુર્ઘટના સર્જાય તેવી શક્યતાને નકારી શકાય નહીં. તેથી શિક્ષણ વિભાગ, જિલ્લા પંચાયત અને સંબંધિત અધિકારીઓ દ્વારા સ્થળની મુલાકાત લઈ તાત્કાલિક કાર્યવાહી કરવામાં આવે તેવી માંગ ઉઠી છે.

ડમરાળા ગામની આ સ્થિતિએ ગ્રામ્ય વિસ્તારોની શૈક્ષણિક સુવિધાઓ અને વિદ્યાર્થીઓની સુરક્ષાને લઈને અનેક પ્રશ્નો ઉભા કર્યા છે.

---------------

હિન્દુસ્થાન સમાચાર / DISHANT NANDRAMBHAI GONADLIYA