જામનગર, 18 જૂન (હિ.સ.) જામનગર જિલ્લાના જામજોધપુર તાલુકાના એક ગામમાં માનવતાને શરમાવે તેવી ગંભીર ઘટના સામે આવી છે. પોતાની જ પુત્રી પર લાંબા સમય સુધી દુષ્કર્મ આચર્યાના આક્ષેપ સાથે એક પિતા સામે જામજોધપુર પોલીસ મથકે દુષ્કર્મ અને પોક્સો સહિતની ગંભીર કલમો હેઠળ ગુનો નોંધવામાં આવ્યો છે.પોલીસ ફરિયાદ મુજબ, પીડિતા સગીર વયની હતી ત્યારથી આરોપી પિતા દ્વારા ઘરના અન્ય સભ્યોની ગેરહાજરીમાં ધાકધમકી આપી વારંવાર શારીરિક શોષણ કરવામાં આવતું હતું. ફરિયાદમાં આરોપ મૂકવામાં આવ્યો છે કે છેલ્લા અંદાજે ત્રણ વર્ષથી આરોપી પિતા પુત્રી પર દુષ્કર્મ આચરતો હતો. પીડિતા ત્રણ મહિના અગાઉ જ પુખ્ત વયમાં પ્રવેશી હતી. લાંબા સમયથી ચાલતા કથિત શોષણથી કંટાળી અંતે તેણીએ હિંમત દાખવી પોલીસ સમક્ષ ફરિયાદ નોંધાવી હતી.ફરિયાદના આધારે જામજોધપુર પોલીસે આરોપી પિતા સામે દુષ્કર્મ સંબંધિત કલમો ઉપરાંત પીડિતા સગીર વયની હતી તે સમયગાળાને ધ્યાનમાં રાખી પોક્સો અધિનિયમ હેઠળ પણ ગુનો નોંધ્યો છે. બનાવની ગંભીરતાને ધ્યાનમાં રાખી પોલીસે આરોપીની અટકાયત કરી લીધી છે. વધુ પૂછપરછ અને તપાસ માટે આરોપીને કોર્ટમાં રજૂ કરી રિમાન્ડ મેળવવાની કાર્યવાહી હાથ ધરવામાં આવી રહી છે.

હિન્દુસ્થાન સમાચાર / Dhaval Nilesh bhai bhatt