નવી દિલ્હી, 19 જૂન (હિ.સ.) ભારતીય જનતા પાર્ટીએ જણાવ્યું કે વડાપ્રધાન નરેન્દ્ર મોદીની તાજેતરની જી-7 શિખર સંમેલન અને સ્લોવાકિયા યાત્રાએ વૈશ્વિક મંચ પર ભારતની વધતી પ્રતિષ્ઠાને વધુ મજબૂત કરી છે. પાર્ટી અનુસાર, કોઈ ભારતીય વડાપ્રધાનની આ પ્રથમ સ્લોવાકિયા યાત્રા હતી અને ત્યાં વડાપ્રધાન મોદીને દેશના સર્વોચ્ચ નાગરિક સન્માનથી સન્માનિત કરવામાં આવ્યા.

ભાજપ મુખ્યાલયમાં શુક્રવારે આયોજિત પત્રકાર પરિષદમાં, પાર્ટીના રાષ્ટ્રીય પ્રવક્તા અને સાંસદ ડૉ. સુધાંશુ ત્રિવેદીએ જણાવ્યું કે, ભાજપના કાર્યકાળમાં જ ભારતને જી7માં વિશેષ આમંત્રિત સભ્ય તરીકે સામેલ કરવામાં આવ્યું હતું.

આવું પ્રથમ વખત 2003માં, અટલજીના કાર્યકાળ દરમિયાન થયું હતું.

તેમણે કહ્યું કે, જી-7 શિખર સંમેલન દરમિયાન ભારતે મહત્વપૂર્ણ ભૂમિકા ભજવી અને ઘણા દેશો સાથે દ્વિપક્ષીય વાર્તાલાપ કર્યા. ભારતે જી-7 દેશો સમક્ષ ઇન્ટરનેશનલ મોબિલાઇઝેશન પાર્ટનરશિપ ફોર એક્સેલરેટિંગ કનેક્ટિવિટી એન્ડ ટ્રેડ (ઇમ્પેક્ટ) નો પ્રસ્તાવ મૂક્યો, જેમાં સભ્ય દેશોએ રસ દાખવ્યો. આ ભારતના વધતા વૈશ્વિક પ્રભાવનો પુરાવો છે. તેમણે કહ્યું કે, વડાપ્રધાન મોદીને અત્યાર સુધીમાં 33 આંતરરાષ્ટ્રીય સન્માન મળી ચૂક્યા છે, જે વિશ્વ સ્તરે તેમના નેતૃત્વની સ્વીકૃતિ દર્શાવે છે.

તેમણે કહ્યું કે, વડાપ્રધાન મોદીના નેતૃત્વમાં ભારત સતત વિશ્વના મુખ્ય દેશોનો વિશ્વાસ મેળવી રહ્યું છે. સાથે જ, ફ્રાન્સ દ્વારા સ્ટેમ શિક્ષણના ક્ષેત્રમાં દર વર્ષે 30 હજાર ભારતીય વિદ્યાર્થીઓ માટે તકો ઉપલબ્ધ કરાવવાના નિર્ણયને પણ ભારત-ફ્રાન્સ સંબંધોની મજબૂતીનો સંકેત ગણાવવામાં આવ્યો.

હિન્દુસ્થાન સમાચાર / વિજયાલક્ષ્મી / સંજીવ પાશ

હિન્દુસ્થાન સમાચાર / માધવી વ્યાસ