બુલંદશહેર/લખનૌ, નવી દિલ્હી, 19 જૂન (હિ.સ.)। ઉત્તર પ્રદેશની એન્ટી ટેરરિસ્ટ સ્ક્વોડ (એટીએસ)એ, દેશવિરોધી પ્રવૃત્તિઓમાં સામેલ બે શંકાસ્પદોની બુલંદશહેરમાંથી ધરપકડ કરી છે. ધરપકડ કરાયેલા આરોપીઓ સોશિયલ મીડિયા મારફતે સ્લીપર સેલ તૈયાર કરવા, ભય અને આતંકનું વાતાવરણ ઊભું કરવાનો પ્રયાસ કરવા તેમજ સંવેદનશીલ સ્થળોની રેકી જેવી પ્રવૃત્તિઓમાં સંકળાયેલા હતા.
અપર પોલીસ મહાનિર્દેશક (એડીજી) કાયદો અને વ્યવસ્થા અમિતાભ યશે ગુરુવારે જારી કરેલા નિવેદનમાં જણાવ્યું કે, પાકિસ્તાની ગેંગસ્ટર શહજાદ ભટ્ટી અને આબિદ જટ્ટના આતંકી નેટવર્ક વિરુદ્ધ ચાલી રહેલા અભિયાન અંતર્ગત ઉત્તર પ્રદેશ એટીએસે બુલંદશહેરમાંથી આ નેટવર્ક સાથે જોડાયેલા અન્ય બે આરોપીઓની ધરપકડ કરી છે. પકડાયેલા શંકાસ્પદોની ઓળખ બુલંદશહેરના અકબરપુર ગામના રહેવાસી મોહમ્મદ ઉમર અને ફૈઝાન તરીકે થઈ છે.
એટીએસની પ્રાથમિક તપાસ અને મળેલી માહિતી અનુસાર, આ બંને આરોપીઓ બુલંદશહેરમાં પોતાની ઓળખ છુપાવીને 'સ્લીપર સેલ' તરીકે રહેતા હતા. સૌથી ચોંકાવનારો ખુલાસો એ થયો છે કે, તેઓ સીધા પાકિસ્તાની આતંકવાદી શહજાદ ભટ્ટી અને તેના હેન્ડલર આબિદ જટ્ટના સંપર્કમાં હતા.
આરોપીઓને પાકિસ્તાની ડોન આબિદ જટ્ટના પોસ્ટરો બુલંદશહેરના વિવિધ વિસ્તારોમાં લગાવવાનું અને તેના વીડિયો બનાવીને મોકલવાનું કામ સોંપવામાં આવ્યું હતું. તેના બદલામાં તેમને રૂપિયા મળવાના હતા. તેમનો હેતુ લોકોમાં ભય અને દહેશતનું વાતાવરણ ઊભું કરવાનો હતો. બંનેને આર્મી કૅન્ટ જેવા સંવેદનશીલ વિસ્તારોની રેકી કરવાની જવાબદારી પણ સોંપવામાં આવી હતી. આરોપીઓ પાસેથી આબિદ જટ્ટના પોસ્ટરો, પોસ્ટર લગાવતી વખતે બનાવેલા વીડિયો અને અન્ય ડિજિટલ પુરાવા મળી આવ્યા છે.
એટીએસ અને સુરક્ષા તપાસ એજન્સીઓ બંને આરોપીઓની વધુ પૂછપરછ કરી રહી છે. સુરક્ષા એજન્સીઓ હવે એ જાણવા પ્રયાસ કરી રહી છે કે, આ બંને શંકાસ્પદોને પાકિસ્તાન તરફથી કયા પ્રકારના નિર્દેશો મળી રહ્યા હતા અને પશ્ચિમ ઉત્તર પ્રદેશમાં તેમના નેટવર્ક સાથે અન્ય કોણ-કોણ જોડાયેલા છે. આગામી દિવસોમાં આ મામલે વધુ મોટા ખુલાસા થવાની સંભાવના છે.
હિન્દુસ્થાન સમાચાર / દીપક / અજય સિંહ
હિન્દુસ્થાન સમાચાર / ડો.હિતેશ એન.વ્યાસ
