વડોદરા, 02 જૂન (હિ.સ.)- અમૃત ભારત સ્ટેશન યોજના હેઠળ વડોદરાના ઐતિહાસિક પ્રતાપનગર રેલ્વે સ્ટેશનનો વ્યાપક પુનર્વિકાસ પૂર્ણ કરવામાં આવ્યો છે. અંદાજે ₹71.58 કરોડના ખર્ચે હાથ ધરાયેલા આ પ્રોજેક્ટથી સ્ટેશનને આધુનિક સુવિધાઓ અને આકર્ષક માળખા સાથે નવો ભવ્ય દેખાવ મળ્યો છે.

પ્રતાપનગર રેલ્વે સ્ટેશનનું ઐતિહાસિક મહત્વ પણ વિશેષ રહ્યું છે. વર્ષ 1880માં નેરોગેજ રેલ્વે માટે મુખ્ય કેન્દ્ર તરીકે વિકસેલા આ સ્ટેશન પર વર્ષ 1922માં મહત્વપૂર્ણ રેલ્વે વર્કશોપની સ્થાપના કરવામાં આવી હતી. હાલમાં તેને વડોદરા રેલ્વે સ્ટેશન પરનું ટ્રાફિક દબાણ ઘટાડવા માટે વ્યૂહાત્મક સેટેલાઇટ સ્ટેશન તરીકે વિકસાવવામાં આવી રહ્યું છે. ઉપરાંત, સ્ટેચ્યુ ઓફ યુનિટીની મુલાકાત લેતા પ્રવાસીઓ માટે પણ આ મહત્વપૂર્ણ બોર્ડિંગ સ્ટેશન બની રહ્યું છે.

વડોદરા ડિવિઝનના ડિવિઝનલ રેલ્વે મેનેજર રાજુ ભડકેના જણાવ્યા અનુસાર, પ્રતાપનગર સ્ટેશનનો આ પુનર્વિકાસ માત્ર મુસાફરોને વધુ સારી સુવિધાઓ પૂરી પાડશે એટલું જ નહીં, પરંતુ વડોદરાના રેલ્વે ઇન્ફ્રાસ્ટ્રક્ચરને પણ નવી ઊંચાઈએ પહોંચાડશે.

પુનર્વિકાસ અંતર્ગત પ્લેટફોર્મ નંબર 1, 2 અને 3 પર મુસાફરોની સુવિધાઓમાં વધારો કરવામાં આવ્યો છે, જ્યારે નવું પ્લેટફોર્મ નંબર 4 પણ વિકસાવવામાં આવ્યું છે. પ્લેટફોર્મ પર આધુનિક શેલ્ટર, આરામદાયક બેઠક વ્યવસ્થા, વધારાના શૌચાલયો, નવી ઓફિસો, આધુનિક સાઇનેજ સિસ્ટમ તેમજ દિવ્યાંગજન માટે અનુકૂળ બુકિંગ કાઉન્ટર તૈયાર કરવામાં આવ્યા છે. મુસાફરોની સુવિધા માટે સ્ટેશન પર બે નવી લિફ્ટ પણ સ્થાપિત કરવામાં આવી છે.

સ્ટેશનના બીજા પ્રવેશદ્વાર પર નવા સ્ટેશન બિલ્ડિંગ અને કોમર્શિયલ વિસ્તારનું નિર્માણ પૂર્ણ કરવામાં આવ્યું છે. અહીં સુવ્યવસ્થિત ટ્રાફિક મેનેજમેન્ટ, પાર્કિંગ સુવિધા અને સરળ પ્રવેશ-નિકાસ માટે આધુનિક માળખું વિકસાવવામાં આવ્યું છે.

મુસાફરોને વધુ સારો અનુભવ મળે તે માટે કોનકોર્સ વિસ્તારનું પણ આધુનિકીકરણ કરવામાં આવ્યું છે. આધુનિક ફ્લોરિંગ, આકર્ષક વોલ ક્લેડિંગ, રેલ્વેના ઇતિહાસને દર્શાવતા શિલ્પો અને કલાત્મક ભીંતચિત્રો સ્ટેશનને વિશિષ્ટ ઓળખ આપે છે. સાથે જ અદ્યતન લાઇટિંગ સિસ્ટમથી સમગ્ર પરિસર વધુ આકર્ષક બન્યું છે.

દિવ્યાંગજન મુસાફરો માટે વિશેષ સુવિધાઓ વિકસાવવામાં આવી છે. લિફ્ટ સાથે જોડાયેલ ફૂટ ઓવરબ્રિજ, રેમ્પ અને સુલભ બુકિંગ કાઉન્ટર જેવી વ્યવસ્થાઓ દ્વારા સ્ટેશનને સંપૂર્ણ દિવ્યાંગજન-મૈત્રીપૂર્ણ બનાવવાનો પ્રયાસ કરવામાં આવ્યો છે.

મુસાફરોની સરળ અવરજવર માટે સ્ટેશનની બંને બાજુને જોડતો 12 મીટર પહોળો ફૂટ ઓવરબ્રિજ પણ બનાવવામાં આવ્યો છે. બંને છેડે રેમ્પ અને લિફ્ટની સુવિધા ઉપલબ્ધ કરાવવામાં આવી છે, જેથી મુસાફરોને પ્લેટફોર્મ સુધી પહોંચવામાં સરળતા રહે.

પ્રતાપનગર રેલ્વે સ્ટેશનનો આ આધુનિક પુનર્વિકાસ ભારતીય રેલ્વેની ‘મુસાફર સુવિધા, સરળ મુસાફરી અને આધુનિક સ્ટેશનો’ની દિશામાં એક મહત્વપૂર્ણ સિદ્ધિ માનવામાં આવી રહી છે.

---------------

હિન્દુસ્થાન સમાચાર / યજુવેન્દ્ર દુબે