ઇસ્તંબુલ, નવી દિલ્હી, 22 જૂન (હિ.સ.). કતારના અગ્રણી ઔદ્યોગિક વિસ્તાર રાસ લાફાન ઇન્ડસ્ટ્રિયલ સિટીમાં સોમવારે સવારે એક ફેક્ટરીમાં મોટો બ્લાસ્ટ થયો છે. પ્રાથમિક માહિતી અનુસાર, આ ઘટનામાં 54 લોકો ઘાયલ થયા છે, જ્યારે 18 લોકો હજુ પણ ગુમ હોવાનું કહેવાય છે. એવું માનવામાં આવે છે કે, આ બ્લાસ્ટ ટેકનિકલ ખામીના કારણે થયો હતો અને સિવિલ ડિફેન્સની ટીમો સતત રાહત અને બચાવ કામગીરીમાં લાગેલી છે.

તુર્કીની સરકારી સમાચાર સંસ્થા અનાદોલુ એજન્સી અને અન્ય મીડિયાએ કતારના ગૃહ મંત્રાલયને ટાંકીને જણાવ્યું હતું કે, અગ્રણી ઔદ્યોગિક વિસ્તાર રાસ લાફાન ઇન્ડસ્ટ્રિયલ સિટીમાં એક ફેક્ટરીમાં થયેલા બ્લાસ્ટ બાદ સ્થિતિ ગંભીર બનેલી છે. પ્રાથમિક માહિતી મુજબ, આ ઘટનામાં ઓછામાં ઓછા 54 લોકો ઘાયલ થયા છે અને 18 લોકો હજુ પણ ગુમ હોવાનું કહેવાય છે. સિવિલ ડિફેન્સ અને કતારી ઇન્ટરનેશનલ સર્ચ એન્ડ રેસ્ક્યુ ગ્રુપની ટીમો ઘટનાસ્થળે સર્ચ ઓપરેશન ચલાવી રહી છે.

મંત્રાલયે જણાવ્યું હતું કે, આ બ્લાસ્ટ ટેકનિકલ ખામીના કારણે થયો હતો. ઘટના બાદ તરત જ ઇમરજન્સી સેવાઓ ઘટનાસ્થળે પહોંચી ગઈ હતી અને વિસ્તારને નિયંત્રણમાં લેવામાં આવ્યો હતો. ગુમ થયેલા લોકોની શોધ માટે મોટા પાયે અભિયાન ચલાવવામાં આવી રહ્યું છે.

જોકે, આ પહેલા જાહેર કરાયેલા એક પ્રારંભિક નિવેદનમાં ગૃહ મંત્રાલયે જણાવ્યું હતું કે, આ ઘટનામાં કોઈ ઘાયલ થયું નથી અને કોઈ જોખમી લીકેજ પણ જોવા મળ્યું નથી. બાદના અહેવાલોમાં ઘાયલ અને ગુમ થયેલા લોકોની સંખ્યા સામે આવી હતી, જેના કારણે પરિસ્થિતિ અંગે અપડેટ્સ જાહેર કરવામાં આવી રહ્યા છે.

અધિકારીઓએ એ પણ સ્પષ્ટ કર્યું છે કે, હાલમાં કોઈ ગેસ લીકેજ અથવા મોટા પર્યાવરણીય જોખમના સંકેતો મળ્યા નથી, જોકે તપાસ ચાલુ છે. ઘટનાના કારણો અને પ્રભાવિત ફેક્ટરી અથવા ઓપરેટર વિશે હજુ સુધી કોઈ સત્તાવાર માહિતી આપવામાં આવી નથી.

રાસ લાફાન ઇન્ડસ્ટ્રિયલ સિટી કતારના દોહાથી લગભગ 80 કિલોમીટર ઉત્તરમાં ઉર્જા ક્ષેત્રનું એક મહત્વપૂર્ણ કેન્દ્ર છે, જ્યાં એલએનજી અને પેટ્રોકેમિકલ ઉત્પાદન સાથે સંકળાયેલા અનેક મોટા એકમો આવેલા છે. આ જ કારણે સુરક્ષા એજન્સીઓ આ ઘટનાને લઈને વિશેષ તકેદારી રાખી રહી છે.

હિન્દુસ્થાન સમાચાર / અમરેશ દ્વિવેદી

હિન્દુસ્થાન સમાચાર / માધવી વ્યાસ