નવી દિલ્હી, 28 જૂન (હી.સ.): સ્કોટલેન્ડ ફૂટબોલ એસોસિએશન અનુસાર, સ્કોટલેન્ડની મેન્સ નેશનલ ફૂટબોલ ટીમના મુખ્ય કોચ સ્ટીવ ક્લાર્કે તેમના પદ પરથી રાજીનામું આપી દીધું છે. એસોસિએશને એક નિવેદનમાં જણાવ્યું હતું કે, દેશના સૌથી સફળ રાષ્ટ્રીય કોચે ફીફા વર્લ્ડ કપ 2026 માંથી સ્કોટલેન્ડની બહાર થવાની પુષ્ટિ થયા બાદ તેમના સાત વર્ષના કાર્યકાળનો અંત લાવવાનો નિર્ણય લીધો છે. તેમના કાર્યકાળ દરમિયાન, સ્ટીવે સ્કોટલેન્ડને 28 વર્ષમાં પ્રથમ વખત પુરુષોના ફીફા વર્લ્ડ કપમાં લઈ ગયા અને સતત બે વાર યુઈએફએ યુરોપિયન ચેમ્પિયનશિપ માટે ક્વોલિફાય કર્યું.

સ્કોટલેન્ડે ફીફા વર્લ્ડ કપ 2026 માં હૈતી સામે 1-0 થી જીત સાથે તેમના અભિયાનની શરૂઆત કરી. મોરોક્કો અને બ્રાઝિલ સામેના પરાજયના પરિણામે સ્કોટલેન્ડ તેમના જૂથમાં ત્રીજા સ્થાને રહ્યું અને ટુર્નામેન્ટમાંથી બહાર થઈ ગયું. સ્ટીવ ક્લાર્કે તેમના કાર્યકાળ દરમિયાન ટીમની સિદ્ધિઓ પર ગર્વ વ્યક્ત કર્યો. તેમણે કહ્યું કે, આ વિદાયનો સૌથી ભાવનાત્મક ભાગ મારા ખેલાડીઓ માટે છે, જેમના વિના 2019 થી અમે જે યાદો બનાવી છે તે શક્ય ન હોત. તેઓ દરેક પ્રશંસા અને આદરને પાત્ર છે, અને તેમના કોચ બનવું એ ખરેખર સન્માનની વાત રહી છે. તેમણે ઉમેર્યું, મને આ તક આપવા બદલ આભાર અને મારા અનુગામીને શુભકામનાઓ.

સ્કોટિશ ફૂટબોલ એસોસિએશનના ચીફ એક્ઝિક્યુટિવ ઓફિસર ઇયાન મેક્સવેલે કહ્યું, અમે બધા ગ્રુપ સ્ટેજમાં વર્લ્ડ કપમાંથી બહાર થવાથી નિરાશ છીએ, પરંતુ સ્ટીવના સાત વર્ષના કાર્યકાળ દરમિયાન થયેલી જબરદસ્ત પ્રગતિને આપણે ભૂલવી ન જોઈએ. તેમણે સ્કોટલેન્ડને એક મોટી ટુર્નામેન્ટમાં પરત લાવવાની પોતાની જવાબદારી નિભાવી. અમે સ્ટીવને તેમના રેકોર્ડબ્રેક યોગદાન બદલ આભાર માનીએ છીએ.

હિન્દુસ્થાન સમાચાર / વીરેન્દ્ર સિંહ / મુકુન્દ

હિન્દુસ્થાન સમાચાર / માધવી વ્યાસ