કારાસ (વેનેઝુએલા), નવી દિલ્હી, 28 જૂન (હિ,સ,). તાજેતરમાં ભૂસ્તરશાસ્ત્રીય આફતોનો સામનો કરી રહેલા વેનેઝુએલા ફરીથી હચમચી ઉઠ્યું છે. આ વખતે ભૂકંપની તીવ્રતા રિક્ટર સ્કેલ પર 5.6 માપવામાં આવી હતી. યુરોપિયન-ભૂમધ્ય ભૂકંપશાસ્ત્રીય કેન્દ્ર (ઈએમએસસી) એ, એક્સ-પોસ્ટ પર ભૂકંપની જાણ કરી હતી. ઈએમએસસી અનુસાર, અરાગુઆ કિનારે સમુદ્રમાં 30 કિલોમીટરની ઊંડાઈએ 5.6 ની તીવ્રતાનો ભૂકંપ આવ્યો હતો. ભૂકંપગ્રસ્ત વેનેઝુએલામાં લાખો લોકો પહેલાથી જ મુશ્કેલીમાં છે.

રાષ્ટ્રીય વિધાનસભાના અધ્યક્ષ જોર્જ રોડ્રિગ્ઝે, શનિવારે દેશના ભૂકંપગ્રસ્ત ઉત્તર-મધ્ય પ્રદેશની પરિસ્થિતિ અંગે નવીનતમ વિગતો શેર કરી. તેમણે કહ્યું કે 24 જૂનના ભૂકંપમાં મૃત્યુઆંક વધીને 1,430 થયો છે અને 3,238 લોકો ઘાયલ થયા છે. વેનેઝુએલાના સ્પેનિશ ભાષાના અખબાર, ધ નેશનલ અનુસાર રોડ્રિગ્ઝે રાષ્ટ્રને સંબોધનમાં જણાવ્યું હતું કે, આ દુર્ઘટનાથી 3,142 પરિવારો બેઘર થઈ ગયા છે અને ભૂકંપથી પ્રભાવિત સાત રાજ્યોમાં સ્થાપિત કામચલાઉ આશ્રયસ્થાનોમાં તેમની સંભાળ રાખવામાં આવી રહી છે. અમે અમારા 1,430 સાથી નાગરિકોના મૃત્યુની જાણ કરી રહ્યા છીએ, તેમણે કહ્યું. અમે આ વેનેઝુએલાના લોકોના પરિવારો અને પ્રિયજનો પ્રત્યે અમારી ઊંડી સંવેદના વ્યક્ત કરીએ છીએ.

કાર્યકારી રાષ્ટ્રપતિ ડેલ્સી રોડ્રિગ્ઝે રાજ્ય ટેલિવિઝન પર એમ પણ જણાવ્યું હતું કે 10 વધુ દેશોની બચાવ ટીમો ટૂંક સમયમાં રાહત કામગીરીમાં જોડાશે. તેમણે ઉમેર્યું હતું કે સુરક્ષા અને સ્વચ્છતા હેતુઓ માટે લા ગુએરામાં 14,000 સૈનિકો અને પોલીસ અધિકારીઓને તૈનાત કરવામાં આવ્યા છે. ભૂકંપના કેન્દ્રબિંદુ મોરોન અને લા ગુએરાના કેટલાક ભાગોમાં વીજળી પુરવઠો ખોરવાયો છે.

વેનેઝુએલાના દરિયાકાંઠાના શહેર લા ગુએરામાં ઓછામાં ઓછી 100 રહેણાંક બહુમાળી ઇમારતોને સંપૂર્ણપણે અથવા આંશિક રીતે નુકસાન થયું છે. સ્થાનિકો અને સ્વયંસેવકો કહે છે કે, ભારે મશીનરીના અભાવ અને રાહત કાર્યની ધીમી ગતિને કારણે બચાવ કામગીરીમાં અવરોધ આવી રહ્યો છે.

સરકારનું કહેવું છે કે સેંકડો લોકો હજુ પણ ગુમ છે અથવા કાટમાળ નીચે ફસાયેલા હોઈ શકે છે. દરમિયાન, એક વિપક્ષી વેબસાઇટનો દાવો છે કે 54,000 થી વધુ લોકો ગુમ છે.

અમેરિકી ભૂસ્તરશાસ્ત્રીય સર્વેનો અંદાજ છે કે, 7.2 અને 7.5 ની તીવ્રતાના આ બે ભૂકંપમાં મૃત્યુઆંક 10,000 થી વધુ થઈ શકે છે. જો આવું થાય, તો તે લેટિન અમેરિકાની એક સદીમાં સૌથી ભયંકર ભૂકંપ આપત્તિ હોઈ શકે છે. સંયુક્ત રાષ્ટ્ર અનુસાર, આ આપત્તિથી આશરે 7 મિલિયન લોકો પ્રભાવિત થઈ શકે છે. સંગઠનનો અંદાજ છે કે આશરે 6.7 બિલિયન ડોલરનું સીધું આર્થિક નુકસાન થશે. વેનેઝુએલાની સરકારે અહેવાલ આપ્યો છે કે શનિવાર સુધીમાં, વિવિધ દેશોમાંથી 1,600 બચાવ કાર્યકરો શોધ અને બચાવ કામગીરીમાં જોડાવા માટે પહોંચ્યા હતા. યુનાઇટેડ સ્ટેટ્સથી રાહત પુરવઠો લઈને જતી પ્રાથમિક સારવાર ફ્લાઇટ્સ પણ કારાકાસ પહોંચી ગઈ છે.

હિન્દુસ્થાન સમાચાર / મુકુંદ

હિન્દુસ્થાન સમાચાર / માધવી વ્યાસ