શ્રીનગર, નવી દિલ્હી, 03 જૂન (હિ.સ.). કાઉન્ટર ઇન્ટેલિજન્સ કાશ્મીર (સીઆઈકે)એ, બુધવારે ખીણના છ જિલ્લાના આઠ સ્થળોએ તલાશી અભિયાન ચલાવ્યું. આ કાર્યવાહી એક દાયકા જૂની એફઆઈઆરના સંબંધમાં કરવામાં આવી છે, જે પાકિસ્તાન સમર્થિત આતંકી સંગઠનો, સ્લીપર સેલ નેટવર્ક અને કટ્ટરપંથી પ્રવૃત્તિઓ સાથે સંકળાયેલી છે.

એક અધિકારીએ જણાવ્યું કે, આ તલાશી અભિયાન સીઆઈકે શ્રીનગર પોલીસ સ્ટેશનની એફઆઈઆર નંબર 02/2015 હેઠળ ચલાવવામાં આવી રહ્યું છે, જે વિદેશી અધિનિયમની કલમ 14, ગેરકાનૂની પ્રવૃત્તિઓ (પ્રતિબંધ) અધિનિયમ (યુએપીએ)ની કલમ 15, 16, 17 અને 19 તથા શસ્ત્ર અધિનિયમની કલમ 7/25 હેઠળ નોંધવામાં આવી છે.

અધિકારીઓએ જણાવ્યું કે, તાજેતરની ગુપ્ત માહિતી, ટેકનિકલ વિશ્લેષણ અને સીઆઈકે દ્વારા કરવામાં આવેલી સતત તપાસના આધારે શ્રીનગરમાં બે, બાંદીપોરામાં બે, કુપવારામાં એક, અનંતનાગમાં એક, કુલગામમાં એક અને સોપોર/બારામુલામાં એક તલાશી માટે નિર્ધારિત સ્થળોની ઓળખ કરવામાં આવી છે.

આરોપ છે કે, શંકાસ્પદ ગુપ્ત સંચાર પ્લેટફોર્મ્સ દ્વારા પાકિસ્તાન સ્થિત આતંકવાદી સંચાલકોના સંપર્કમાં છે અને તેમના પર ચરમપંથી પ્રચાર, કટ્ટરપંથી પ્રવૃત્તિઓ અને આતંકવાદને પ્રોત્સાહન આપવામાં સામેલ હોવાની શંકા છે.

સીઆઈકેના એક અધિકારીએ જણાવ્યું, તલાશીનો ઉદ્દેશ્ય વાંધાજનક સામગ્રી જપ્ત કરવી, આતંકવાદી સંબંધોની પુષ્ટિ કરવી, સહયોગીઓ, સહાયકો અને જમીની સ્તરે કામ કરતા કાર્યકરોની ઓળખ કરવી અને તપાસને આગળ વધારવા માટે ઉપયોગી ગુપ્ત માહિતી એકત્રિત કરવી છે.

અધિકારીએ જણાવ્યું કે, જરૂરી કાનૂની ઔપચારિકતાઓ પૂર્ણ કરવામાં આવી રહી છે અને સક્ષમ અદાલતમાંથી તલાશી વોરંટ મેળવી લેવામાં આવ્યા છે. તેમણે કહ્યું કે, તલાશી સ્થાપિત કાનૂની પ્રક્રિયાઓ અનુસાર પર્યાપ્ત સુરક્ષા વ્યવસ્થા અને ટેકનિકલ સહાયતા ટીમો સાથે કરવામાં આવશે.

હિન્દુસ્થાન સમાચાર / બલવાન સિંહ / મુકુંદ

હિન્દુસ્થાન સમાચાર / ડો.હિતેશ એન.વ્યાસ