જામનગર, 03 જૂન (હિ.સ.) :

અમેરિકાના પ્રમુખ ડોનાલ્ડ ટ્રમ્પની દીકરી ટિફની ટ્રમ્પ અને તેમના પતિ માઈકલ બોલોસ જામનગર નજીક આવેલા વનતારાની મુલાકાત પૂર્ણ કરીને ગઈકાલે (બીજી જૂન) દિલ્હી જવા રવાના થયા હતા. વિદેશી મહાનુભાવોની સુરક્ષાને ધ્યાનમાં રાખીને જામનગરમાં કડક પોલીસ બંદોબસ્ત અને વિશેષ સુરક્ષા વ્યવસ્થા ગોઠવવામાં આવી હતી.

ટિફની ટ્રમ્પ અને માઈકલ બોલોસ વનતારાથી જામનગર એરપોર્ટ તરફ રવાના થયા ત્યારે એરપોર્ટ સુધીના સમગ્ર માર્ગ પર પોલીસ દ્વારા ચુસ્ત સુરક્ષા વ્યવસ્થા ગોઠવવામાં આવી હતી. વિદેશી મહાનુભાવોના કાફલાને કારણે સામાન્ય વાહનવ્યવહારને કોઈ અસર ન પડે અને માર્ગ વ્યવહાર સુચારૂ રીતે ચાલતો રહે તે માટે ટ્રાફિક પોલીસ દ્વારા વિશેષ આયોજન કરવામાં આવ્યું હતું.

જામનગર એરપોર્ટ પર પહોંચ્યા બાદ તમામ જરૂરી સુરક્ષા પ્રક્રિયાઓ અને પ્રોટોકોલ પૂર્ણ કરવામાં આવ્યા હતા. ત્યારબાદ તેઓ ચાર્ટર ફ્લાઇટ મારફતે પોતાના આગામી પ્રવાસ માટે દિલ્હી જવા રવાના થયા હતા. તેમના આગમનથી લઈને પ્રસ્થાન સુધી સ્થાનિક પોલીસ ઉપરાંત અન્ય સુરક્ષા એજન્સીઓ પણ સતત એલર્ટ મોડ પર જોવા મળી હતી.

નોંધનીય છેકે, વન્યજીવ બચાવ, સારવાર અને સંરક્ષણ કેન્દ્ર તરીકે આંતરરાષ્ટ્રીય સ્તરે ઓળખ મેળવનારા 'વનતારા'ની મુલાકાત દરમિયાન આ દંપતીએ ભારે રસ દાખવ્યો હતો.

---------------

હિન્દુસ્થાન સમાચાર / Dhaval Nilesh bhai bhatt