પિથોરાગઢ (ઉત્તરાખંડ), નવી દિલ્હી, 03 જૂન (હિ. સ.). સરહદીય જિલ્લા પિથોરાગઢમાં આવેલા પવિત્ર આદિ કૈલાસ અને ઓમ પર્વત યાત્રા પ્રત્યે શ્રદ્ધાળુઓ અને પર્યટકોનું આકર્ષણ સતત વધી રહ્યું છે. યાત્રા શરૂ થયાના માત્ર 33 દિવસની અંદર 30,016 ઇનર લાઇન પરમિટ જારી થવા સાથે આ વર્ષે યાત્રાએ નવો રેકોર્ડ બનાવ્યો છે.

જિલ્લા વહીવટીતંત્રના જણાવ્યા અનુસાર, 02 જૂન સુધીમાં કુલ 30,016 ઇનર લાઇન પરમિટ જારી કરવામાં આવ્યા છે. માત્ર 02 જૂનના રોજ 1,178 પરમિટ જારી થયા હતા. યાત્રાનો શુભારંભ 01 મેના રોજ જોલીકોંગ સ્થિત પાર્વતી કુંડ નજીક આવેલા શિવ મંદિરના કપાટ ખુલવા સાથે થયો હતો.

આંકડાઓ અનુસાર, વર્ષ 2024માં સમગ્ર યાત્રા સત્ર દરમિયાન 29,352 અને વર્ષ 2025માં 36,526 ઇનર લાઇન પરમિટ જારી થયા હતા. આવી સ્થિતિમાં, આ વર્ષે માત્ર 33 દિવસમાં 30 હજારનો આંકડો પાર થવો યાત્રા પ્રત્યે વધતી આસ્થા અને લોકપ્રિયતાનો સ્પષ્ટ સંકેત માનવામાં આવી રહ્યો છે.

જિલ્લા વહીવટીતંત્ર મુજબ, 01 થી 31 મે વચ્ચે લગભગ 28 હજાર શ્રદ્ધાળુઓ અને પર્યટકો આદિ કૈલાસ અને ઓમ પર્વત પહોંચ્યા, જે ગયા વર્ષની સરખામણીમાં 150 ટકાથી વધુ વૃદ્ધિ દર્શાવે છે. વડાપ્રધાન નરેન્દ્ર મોદીના ઓક્ટોબર 2023માં આદિ કૈલાસની મુલાકાત અને જૂન 2024માં મુખ્યમંત્રી પુષ્કર સિંહ ધામી દ્વારા અહીં યોગ સાધના કરવામાં આવ્યા બાદ, આ આધ્યાત્મિક ધામને રાષ્ટ્રીય સ્તરે નવી ઓળખ મળી છે. ત્યારથી દેશભરમાંથી આવતા શ્રદ્ધાળુઓ અને પ્રકૃતિ પ્રેમીઓની સંખ્યા સતત વધી રહી છે.

જિલ્લાધિકારી આશિષ ભટગાંઈએ જણાવ્યું કે, આદિ કૈલાસ યાત્રા સરહદીય વિસ્તારના લોકો માટે રોજગારનું મહત્વપૂર્ણ માધ્યમ બનીને ઉભરી છે. પર્યટન આધારિત પ્રવૃત્તિઓને પ્રોત્સાહન મળવાથી સ્થાનિક અર્થતંત્ર મજબૂત બન્યું છે તથા સરહદને અડીને આવેલા ગામોમાં રોજગારની તકો વધવાથી સ્થળાંતર રોકવામાં પણ મદદ મળી રહી છે. વહીવટીતંત્રે યાત્રીઓને અપીલ કરી છે કે યાત્રા પર આવતા પહેલા જરૂરી દસ્તાવેજો સાથે રાખે, હવામાનની માહિતી મેળવે અને વહીવટીતંત્રની માર્ગદર્શિકાનું પાલન કરીને સુરક્ષિત યાત્રા સુનિશ્ચિત કરે.

હિન્દુસ્થાન સમાચાર / રાજેશ કુમાર પાંડેય / મુકુંદ

હિન્દુસ્થાન સમાચાર / માધવી વ્યાસ