- મુખ્યમંત્રી ડૉ. યાદવે ઉજ્જૈનની પ્રતિભાશાળી દીકરી દીક્ષાને અભિનંદન પાઠવ્યા.

ભોપાલ, નવી દિલ્હી, 04 જૂન (હિ.સ.). મધ્યપ્રદેશના ઉજ્જૈનની દીકરી દીક્ષા કુશવાહે માત્ર 22 મિનિટમાં આઠ મિલીમીટર કદના ચણાની દાળના 12 દાણા પર 12 જ્યોતિર્લિંગોની પેઇન્ટિંગ બનાવીને વર્લ્ડ વાઇડ બુક ઑફ રેકોર્ડ્સમાં પોતાનું નામ નોંધાવ્યું છે. રાજ્યના મુખ્યમંત્રી ડૉ. મોહન યાદવે આ સિદ્ધિ બદલ દીક્ષાને અભિનંદન પાઠવ્યા છે.

મુખ્યમંત્રી ડૉ. યાદવે, ગુરુવારે સોશિયલ મીડિયા પર પોતાના અભિનંદન સંદેશમાં જણાવ્યું છે કે, ઉજ્જૈનની પ્રતિભાશાળી દીકરી દીક્ષાની કલાને વર્લ્ડ વાઇડ બુક ઑફ રેકોર્ડ્સમાં સ્થાન મળ્યું છે. દીક્ષાએ ફક્ત 22 મિનિટમાં 8 મિમી કદની ચણાની દાળના 12 દાણા પર 12 જ્યોતિર્લિંગોની પેઇન્ટિંગ બનાવીને અસાધારણ કલાનું પ્રદર્શન કરીને વિશ્વ કીર્તિમાન સ્થાપિત કર્યો. મુખ્યમંત્રીએ તેને ઉજ્જવળ ભવિષ્યની શુભેચ્છાઓ પાઠવતા કહ્યું કે, દીક્ષાએ પોતાની પ્રતિભાથી દેશ અને રાજ્યનું ગૌરવ વધાર્યું છે. વર્લ્ડ વાઇડ બુક ઑફ રેકોર્ડ્સમાં સામેલ થઈને દીક્ષાએ એક નોંધપાત્ર સિદ્ધિ હાંસલ કરી છે.

ઉજ્જૈનના ઋષિ નગર નિવાસી પ્રતિભાશાળી દીક્ષા કુશવાહ ઉત્કૃષ્ટ વિદ્યાલયના ધોરણ 12માં અભ્યાસ કરી રહી છે. તે શહેરના ફ્રીગંજ સ્થિત એક આર્ટ ક્લાસની પણ વિદ્યાર્થીની છે. ત્યાં બાળકોને જોઈને દીક્ષાએ સૂક્ષ્મ કલા શીખી. માત્ર એક વર્ષની સખત મહેનતથી તેણે એક અનોખો કીર્તિમાન રચ્યો. દીક્ષાએ આ મુકામ હાંસલ કરવા માટે ઘણી મહેનત કરી અને 22 મિનિટમાં 8 મિલીમીટર કદની ચણાની દાળ પર ચોકસાઈ અને બારીકાઈ સાથે ભગવાન શિવના 12 જ્યોતિર્લિંગોની આકૃતિઓ કોતરી.

દીક્ષાએ જણાવ્યું કે, 12 જ્યોતિર્લિંગ બનાવવાની પ્રેરણા તેને કેદારનાથ, બદ્રીનાથ અને બાબા મહાકાલના દર્શન પછી મળી. આ ઉપરાંત, ડિગ્રી કોર્સ દરમિયાન કૉલેજના ઘણા વિદ્યાર્થીઓએ વર્લ્ડ રેકોર્ડ બનાવ્યા હતા. સાથી વિદ્યાર્થીઓની સિદ્ધિઓને જોઈને અને સૌથી નાના જ્યોતિર્લિંગ બનાવવાની ઈચ્છાશક્તિથી જ આ કાર્ય શક્ય બન્યું. આટલી નાની દાળ પર શિવલિંગની આકૃતિ કોતરવી અત્યંત પડકારજનક કાર્ય હતું. આ માટે, વિશેષ ઉપકરણોની સાથે સાથે ધૈર્ય, સ્થિર હાથ અને ઊંડી એકાગ્રતાની જરૂર હતી.

હિન્દુસ્થાન સમાચાર / મુકેશ તોમર / રામાનુજ શર્મા

હિન્દુસ્થાન સમાચાર / માધવી વ્યાસ