નવી દિલ્હી, 4 જૂન (હિ.સ.). કેન્દ્ર સરકારે બુધવારે, ઑફર ફોર સેલ (ઓએફએસ) ના છેલ્લા દિવસે, જાહેર ક્ષેત્રની નવરત્ન ઉપક્રમ, એનએચપીસી લિમિટેડમાં પોતાનો હિસ્સો વેચીને આશરે ₹4,300 કરોડ એકત્ર કર્યા.

બોમ્બે સ્ટોક એક્સચેન્જ (બીએસઈ) પર ઉપલબ્ધ માહિતી અનુસાર, 60.27 કરોડ શેરના ઑફર ફોર સેલ (ઓએફએસ) સામે કુલ 151.33 કરોડ શેર માટે બિડ પ્રાપ્ત થઈ હતી. આ ઓએફએસ માં સરકાર દ્વારા ત્રણ ટકા હિસ્સાની ઓફરનો સમાવેશ થાય છે, જેમાં ત્રણ ટકા ગ્રીન શૂ વિકલ્પ - વધારાની બિડ જાળવી રાખવાનો વિકલ્પ શામેલ છે.

સોમવારે, સરકારે જાહેરાત કરી કે તે એનએચપીસી લિમિટેડમાં પોતાનો હિસ્સો ઓફર ફોર સેલ (ઓએફએસ) દ્વારા છ ટકા સુધી વેચશે. લઘુત્તમ વેચાણ કિંમત પ્રતિ શેર ₹71 નક્કી કરવામાં આવી હતી. ચાલુ નાણાકીય વર્ષ 2026-27 માં જાહેર ક્ષેત્રની કંપની માટે આ ત્રીજો ઓએફએસ હતો. ગયા અઠવાડિયે, સરકારે ઓએફએસ દ્વારા કોલ ઇન્ડિયામાં 2% હિસ્સો વેચીને ₹5,542 કરોડ એકત્ર કર્યા હતા. મે મહિનામાં, તેણે સેન્ટ્રલ બેંક ઓફ ઇન્ડિયામાં 8.08% હિસ્સો વેચીને ₹2,266 કરોડ એકત્ર કર્યા હતા. આનાથી ચાલુ નાણાકીય વર્ષ 2026-27માં અત્યાર સુધી ડિસઇન્વેસ્ટમેન્ટમાંથી સરકારને મળેલી કુલ રકમ ₹7,808 કરોડ થઈ ગઈ છે.

નાણાકીય વર્ષ 2026-27 માટેના કેન્દ્રીય બજેટમાં ડિસઇન્વેસ્ટમેન્ટ અને એસેટ મુદ્રીકરણ દ્વારા ₹80,000 કરોડ એકત્ર કરવાનો લક્ષ્યાંક રાખવામાં આવ્યો છે, જે પાછલા નાણાકીય વર્ષ 2025-26 માટેના સુધારેલા બજેટ અંદાજ મુજબ ₹33,837 કરોડ કરતાં બમણાથી વધુ છે.

હિન્દુસ્થાન સમાચાર / પ્રજેશ શંકર / સુનિત નિગમ

હિન્દુસ્થાન સમાચાર / માધવી વ્યાસ