ભાવનગર, 05 જૂન (હિ.સ.) વિશ્વ પર્યાવરણ દિવસ નિમિત્તે ભાવનગરના ડાયવેન્જર સ્કેટિંગ ગ્રુપ દ્વારા પર્યાવરણ સંરક્ષણ અને સ્વચ્છતા અંગે જનજાગૃતિ ફેલાવતો એક અનોખો કાર્યક્રમ યોજાયો હતો. ગ્રુપના સભ્યો દ્વારા તખ્તેશ્વર મહાદેવ મંદિરથી નિષ્કલંક મહાદેવ કોળિયા સુધી વિશેષ સ્કેટિંગ રેલીનું આયોજન કરવામાં આવ્યું હતું. આ રેલી દ્વારા પર્યાવરણ પ્રત્યેની જવાબદારી અને હરિત જીવનશૈલી અપનાવવાનો સંદેશ આપવામાં આવ્યો હતો.

રેલીમાં મોટી સંખ્યામાં સ્કેટર્સ, યુવાનો અને બાળકો ઉત્સાહભેર જોડાયા હતા. હાથમાં પર્યાવરણ બચાવવાના સંદેશા લખેલા બેનરો અને પ્લેકાર્ડ્સ સાથે સ્કેટર્સ શહેરના વિવિધ માર્ગો પરથી પસાર થયા હતા. “વૃક્ષો વાવો, પર્યાવરણ બચાવો”, “પ્લાસ્ટિક મુક્ત ભારત” અને “સ્વચ્છ પર્યાવરણ, સ્વસ્થ જીવન” જેવા સૂત્રો દ્વારા લોકોને પર્યાવરણ પ્રત્યે જાગૃત કરવામાં આવ્યા હતા.

વધતા પ્રદૂષણ, ગ્લોબલ વોર્મિંગ અને કુદરતી સંસાધનોના અતિશય ઉપયોગને કારણે પર્યાવરણ સામે અનેક પડકારો ઊભા થયા છે. આવી સ્થિતિમાં દરેક નાગરિકે પર્યાવરણ જાળવણી માટે પોતાનો ફાળો આપવો જરૂરી બન્યો છે. સ્કેટિંગ જેવી આરોગ્યપ્રદ અને પર્યાવરણમૈત્રી પ્રવૃત્તિ દ્વારા લોકો સુધી સકારાત્મક સંદેશ પહોંચાડવાનો પ્રયાસ કરવામાં આવ્યો હતો.

નિષ્કલંક મહાદેવ કોળિયા ખાતે પહોંચ્યા બાદ પર્યાવરણ સંરક્ષણ અંગે પ્રતિજ્ઞા લેવડાવવામાં આવી હતી. ઉપસ્થિત સૌએ વૃક્ષારોપણ, પ્લાસ્ટિકનો ઓછો ઉપયોગ અને સ્વચ્છતા જાળવવા માટે સંકલ્પ વ્યક્ત કર્યો હતો.

વિશ્વ પર્યાવરણ દિવસની ઉજવણી અંતર્ગત યોજાયેલી આ સ્કેટિંગ રેલી લોકોને પર્યાવરણ પ્રત્યે વધુ સંવેદનશીલ અને જવાબદાર બનાવવામાં સફળ રહી હતી. શહેરમાં યોજાયેલ આ અનોખી પહેલને સ્થાનિક નાગરિકો અને પર્યાવરણપ્રેમીઓએ પણ બિરદાવી હતી.

હિન્દુસ્થાન સમાચાર / DISHANT NANDRAMBHAI GONADLIYA