કોલકતા, નવી દિલ્હી, 05 જૂન (હિ.સ.): બાંગ્લાદેશમાં હાદી ઉસ્માનની હત્યામાં કેન્દ્રીય ગૃહ મંત્રાલયની કથિત સંડોવણી અંગેના વિવાદાસ્પદ દાવા અંગે હવે લાલબજાર સ્થિત કોલકાતા પોલીસ મુખ્યાલયમાં મમતા બેનર્જી સામે ફરિયાદ દાખલ કરવામાં આવી છે. અખિલ ભારતીય હિન્દુ મહાસભાએ આ ફરિયાદ નોંધાવી છે.

ગુરુવારે રાત્રે, અખિલ ભારતીય હિન્દુ મહાસભાએ ભૂતપૂર્વ મુખ્યમંત્રી મમતા બેનર્જી વિરુદ્ધ સાયબર ક્રાઇમ બ્રાન્ચમાં ફરિયાદ રજૂ કરી હતી. સંગઠને કાયદા અનુસાર તેમની સામે કડક અને ઉદાહરણરૂપ કાર્યવાહી કરવાની માંગ કરી છે.

સંગઠનના પ્રદેશ પ્રમુખ ચંદ્રચુડ ગોસ્વામીએ ફરિયાદમાં આરોપ લગાવ્યો હતો કે, ગયા મંગળવારે ધર્મતલ્લા સ્થિત વાય ચેનલ પર આપેલા નિવેદનથી આંતરરાષ્ટ્રીય સ્તરે ભારતની છબીને નુકસાન થયું છે. આ નિવેદન પશ્ચિમ બંગાળ સહિત સમગ્ર દેશમાં સાંપ્રદાયિક સૌહાર્દને અસર કરી શકે છે. પોલીસે આ નિવેદનને ગંભીરતાથી લેવું જોઈએ અને તાત્કાલિક તપાસ કરવી જોઈએ.

ઉલ્લેખનીય છે કે, મમતા બેનર્જીએ તેમના વિરોધ મંચ પરથી દાવો કર્યો હતો કે બાંગ્લાદેશમાં હાદીની હત્યા પછી, હત્યારાઓ ભારતમાં ઘૂસી ગયા હતા અને પશ્ચિમ બંગાળ આવ્યા હતા, જ્યાં પોલીસની સ્પેશિયલ ટાસ્ક ફોર્સ દ્વારા તેમની ધરપકડ કરવામાં આવી હતી. તેમણે સૂચવ્યું હતું કે, કેન્દ્રીય ગૃહ મંત્રાલય આ બાબતથી સંપૂર્ણપણે વાકેફ છે. આ સંદર્ભમાં સિલિગુડીમાં મમતા બેનર્જી સામે એફઆઈઆર દાખલ કરવામાં આવી છે.

હિન્દુસ્થાન સમાચાર / ઓમ પરાશર / મુકુન્દ

હિન્દુસ્થાન સમાચાર / માધવી વ્યાસ