ભાવનગર, 05 જૂન (હિ.સ.) : વિશ્વ પર્યાવરણ દિવસની ઉજવણીના ભાગરૂપે ભાવનગર મહાનગરપાલિકા દ્વારા “એક પેડ માં કે નામ 3.0” અભિયાન અંતર્ગત વૃક્ષારોપણ કાર્યક્રમનું આયોજન કરવામાં આવ્યું હતું. પર્યાવરણ સંરક્ષણ, હરિયાળીનું જતન અને સ્વચ્છ તથા હરિયાળું ભાવનગર નિર્માણના ઉદ્દેશ સાથે યોજાયેલા આ કાર્યક્રમમાં મહાનગરપાલિકાના પદાધિકારીઓ, અધિકારીઓ, કર્મચારીઓ તેમજ નાગરિકોએ ઉત્સાહભેર ભાગ લીધો હતો.
કાર્યક્રમ દરમિયાન વિવિધ સ્થળોએ વૃક્ષોના રોપાઓનું વાવેતર કરવામાં આવ્યું હતું. વૃક્ષો માત્ર પર્યાવરણનું સંતુલન જાળવવામાં જ નહીં પરંતુ પ્રદૂષણ ઘટાડવા, ઓક્સિજનનું પ્રમાણ વધારવા અને ભાવિ પેઢી માટે સ્વસ્થ જીવન પર્યાવરણ ઊભું કરવામાં પણ મહત્વપૂર્ણ ભૂમિકા ભજવે છે. આ બાબતને ધ્યાનમાં રાખીને મહાનગરપાલિકા દ્વારા વધુમાં વધુ વૃક્ષારોપણ કરવા માટે જનજાગૃતિ ફેલાવવાનો પ્રયાસ કરવામાં આવ્યો હતો.
અધિકારીઓએ જણાવ્યું હતું કે “એક પેડ માં કે નામ 3.0” અભિયાન માત્ર વૃક્ષ વાવવાનું અભિયાન નથી, પરંતુ દરેક વ્યક્તિને પ્રકૃતિ સાથે જોડવાનો એક પ્રયાસ છે. દરેક નાગરિક પોતાના પરિવારજનોના નામે એક વૃક્ષ વાવે અને તેનું જતન કરે તો શહેરમાં હરિયાળીનું પ્રમાણ નોંધપાત્ર રીતે વધી શકે છે. વૃક્ષારોપણ સાથે વૃક્ષોના સંવર્ધન અને જાળવણી પર પણ વિશેષ ભાર મૂકવામાં આવ્યો હતો.
ભાવનગર મહાનગરપાલિકા દ્વારા શહેરને વધુ હરિયાળું અને પર્યાવરણમૈત્રી બનાવવાના હેતુથી સતત વિવિધ અભિયાનો હાથ ધરવામાં આવી રહ્યા છે. વિશ્વ પર્યાવરણ દિવસ નિમિત્તે યોજાયેલ આ કાર્યક્રમ દ્વારા નાગરિકોને પર્યાવરણ પ્રત્યે વધુ જવાબદાર બનવાનો સંદેશ આપવામાં આવ્યો હતો.
“પર્યાવરણ સંરક્ષણ અને હરિયાળા ભાવનગર તરફ એક વધુ પગલું”ના સંકલ્પ સાથે સૌએ વધુમાં વધુ વૃક્ષો વાવીને તેમના ઉછેર અને સંવર્ધનમાં સહભાગી બનવાની પ્રતિબદ્ધતા વ્યક્ત કરી હતી. આ પ્રકારના પ્રયાસો શહેરને સ્વચ્છ, હરિયાળું અને આરોગ્યપ્રદ બનાવવામાં મહત્વપૂર્ણ સાબિત થશે.
---------------
હિન્દુસ્થાન સમાચાર / DISHANT NANDRAMBHAI GONADLIYA
