જુનાગઢ 05 જૂન (હિ.સ.) સમગ્ર વિશ્વમાં જ્યારે પર્યાવરણની સુરક્ષા અને પ્રકૃતિના જતન માટે જાગૃતિ ફેલાવવામાં આવી રહી છે, ત્યારે જૂનાગઢ ચાઇલ્ડ હેલ્પલાઇન પ્રોજેક્ટ દ્વારા પણ ‘વિશ્વ પર્યાવરણ દિવસ’ની ઉત્સાહભેર અને સાર્થક ઉજવણી કરવામાં આવી હતી. આ વિશેષ ઉજવણી અંતર્ગત ટીમ દ્વારા પર્યાવરણની જાળવણી અને પ્રકૃતિ પ્રત્યેની જવાબદારીના ભાગરૂપે પ્રેરણાદાયી કાર્યક્રમનું આયોજન કરવામાં આવ્યું હતું.

જૂનાગઢ ચાઇલ્ડ હેલ્પલાઇન પ્રોજેક્ટના પ્રોજેક્ટ કો-ઓર્ડીનેટર શીતલબેન મારૂ તથા તેમની સમગ્ર ટીમ દ્વારા આ પ્રસંગે પર્યાવરણની શુદ્ધિ અને હરિયાળી ક્રાંતિના સંકલ્પ સાથે વિશેષ વૃક્ષારોપણ (વૃક્ષારોપણ અભિયાન) કરવામાં આવ્યું હતું. ટીમની બહેનો દ્વારા ઉત્સાહપૂર્વક છોડ વાવીને, તેને પાણી પાઈને પ્રકૃતિના જતન માટેની પોતાની કટિબદ્ધતા વ્યક્ત કરી હતી.

આ તકે પ્રોજેક્ટ કો-ઓર્ડીનેટર શીતલ મારૂએ જણાવ્યું હતું કે, બાળકોના ઉજ્જવળ ભવિષ્ય અને સુરક્ષા માટે જેટલી ચાઇલ્ડ હેલ્પલાઇન જરૂરી છે, તેટલું જ તેમના સ્વસ્થ જીવન માટે શુદ્ધ પર્યાવરણ પણ અનિવાર્ય છે. 'આપણું પર્યાવરણ, આપણી જવાબદારી' સમજીને જો આપણે અત્યારથી જ વૃક્ષોનું વાવેતર અને જતન કરીશું, તો જ આવનારી પેઢીને એક તંદુરસ્ત અને હરિયાળી પૃથ્વી ભેટમાં આપી શકીશું.

સમગ્ર કાર્યક્રમ દરમિયાન ચાઇલ્ડ હેલ્પલાઇનની ટીમ દ્વારા એક વૃક્ષ વાવો, જીવન બચાવો અને સ્વચ્છ પર્યાવરણ, સુખી જીવન જેવા સૂત્રો સાથે લોકોને વધુમાં વધુ વૃક્ષો વાવવા અને પ્લાસ્ટિકનો ઉપયોગ ટાળવા માટે અપીલ કરવામાં આવી હતી. પ્રોજેક્ટની સમગ્ર ટીમે સાથે મળીને આ ઉજવણીને સફળ બનાવી હતી અને સમાજમાં પર્યાવરણ પ્રત્યે જાગૃતિ લાવવાનો એક સરાહનીય પ્રયાસ કર્યો હતો.

---------------

હિન્દુસ્થાન સમાચાર / ભરતસિંહ જાદવ