નવી દિલ્હી, 06 જૂન (હિ.સ.). નેપાળના વિદેશ મંત્રી શિશિર ખનાલ એ, ભારતીય જનતા પાર્ટીના વિદેશી બાબતોના વિભાગના પ્રમુખ ડૉ. વિજય ચોથાઈવાલે સાથે અહીં શનિવારે મુલાકાત કરી. બંને નેતાઓ વચ્ચે નેપાળ-ભારત સંબંધોને વધુ સુદ્રઢ બનાવવા, રાજકીય પક્ષો વચ્ચે સહયોગ વધારવા તથા બંને દેશોના નાગરિકો વચ્ચે સંપર્ક અને સંબંધોનો વિસ્તાર કરવા સહિતના અનેક મુખ્ય મુદ્દાઓ પર ચર્ચા થઈ.

ડૉ. ચોથાઈવાલે એ, સામાજિક મીડિયા મંચ 'એક્સ' પર એક પોસ્ટમાં જણાવ્યું કે, વાતચીતમાં દ્વિપક્ષીય સંબંધોને નવી ગતિ આપવા, પક્ષ-થી-પક્ષ સંવાદને ગાઢ બનાવવા અને જનતા-થી-જનતા સંબંધોને મજબૂત કરવા પર વિશેષ ભાર મૂકવામાં આવ્યો.

વિદેશ મંત્રી ખનાલ, ભારતીય વિદેશ મંત્રી ડૉ. એસ. જયશંકરના આમંત્રણ પર 5 થી 7 જૂન સુધી ભારતના સત્તાવાર પ્રવાસે છે. આ દરમિયાન તેઓ નવી દિલ્હીમાં વિદેશ મંત્રી જયશંકર સાથે ઔપચારિક દ્વિપક્ષીય વાર્તા કરશે.

નેપાળના વિદેશ મંત્રાલય અનુસાર, આ બેઠકમાં બંને દેશોના પરસ્પર હિતો સાથે સંકળાયેલા વિવિધ મુદ્દાઓ પર વ્યાપક ચર્ચા થશે. ખાસ કરીને વેપાર, રોકાણ, સંપર્ક નેટવર્ક, ઊર્જા સહયોગ તથા જનતા-જનતાના સંબંધોને વધુ મજબૂત અને વિસ્તૃત કરવા પર વિચાર-વિમર્શ કરવામાં આવશે. નિયમિત ઉચ્ચસ્તરીય આદાન-પ્રદાનની કડી રૂપે થઈ રહેલી આ યાત્રા નેપાળ અને ભારત વચ્ચેના રાજદ્વારી, ઐતિહાસિક અને બહુઆયામી સંબંધોને વધુ ગાઢ અને મજબૂત બનાવવામાં મહત્વપૂર્ણ ભૂમિકા ભજવશે. નિર્ધારિત કાર્યક્રમ અનુસાર, વિદેશ મંત્રી શિશિર ખનાલ 7 જૂને નેપાળ પરત ફરશે.

હિન્દુસ્થાન સમાચાર / પંકજ દાસ / પવન કુમાર

હિન્દુસ્થાન સમાચાર / ડો.હિતેશ એન.વ્યાસ