નવી દિલ્હી, 8 જૂન (હિ.સ.). કેન્દ્રીય નાણા અને કોર્પોરેટ બાબતોના મંત્રી નિર્મલા સીતારમણે સોમવારે જણાવ્યું હતું કે, 58 કરોડથી વધુ જન ધન ખાતાઓએ કરોડો ભારતીયોને ઔપચારિક બેંકિંગ સિસ્ટમ સાથે જોડ્યા છે. આ વિસ્તરણથી નાણાકીય સમાવેશને પ્રોત્સાહન મળ્યું છે અને ખાતરી થઈ છે કે કલ્યાણકારી લાભો અને પેન્શન કોઈપણ લીકેજ વિના સીધા નાગરિકો સુધી પહોંચે છે.

નાણા મંત્રાલયના જણાવ્યા અનુસાર નાણામંત્રી નિર્મલા સીતારમણે જણાવ્યું હતું કે, જન ધન યોજના હેઠળ, કલ્યાણકારી યોજનાઓ, ઓછી કિંમતનો વીમો અને પેન્શન લાભો સીધા લોકો સુધી પહોંચી રહ્યા છે. તેમણે કહ્યું કે ભારત ગરીબી અને વંચિતતા સામેની લડાઈમાં વૈશ્વિક સ્તરે છાપ છોડી રહ્યું છે.

પ્રધાનમંત્રી જન ધન યોજના 28 ઓગસ્ટ, 2014 ના રોજ શરૂ કરવામાં આવી હતી. તે વિશ્વની સૌથી મોટી નાણાકીય સમાવેશ પહેલોમાંની એક છે. આ યોજના હેઠળ, 56 ટકા ખાતાધારકો મહિલાઓ છે, અને 67 ટકા ખાતા ગ્રામીણ અને અર્ધ-શહેરી વિસ્તારોમાં ખોલવામાં આવ્યા છે.

નાણા મંત્રાલયના જણાવ્યા અનુસાર, જન ધન યોજનાએ લોકોને ઔપચારિક નાણાકીય વ્યવસ્થા સાથે જોડવામાં મદદ કરી છે, તેમના જીવનમાં પરિવર્તન લાવ્યું છે અને દેશની અર્થવ્યવસ્થાને મજબૂત બનાવી છે. મંત્રાલયના જણાવ્યા અનુસાર, ડાયરેક્ટ બેનિફિટ ટ્રાન્સફર (ડીબીટી) દ્વારા આશરે ₹45 લાખ કરોડ સીધા લાભાર્થીઓના ખાતામાં ટ્રાન્સફર કરવામાં આવ્યા છે. હવે, ભારતની 94% પુખ્ત વસ્તી પાસે બેંક ખાતું છે. આ યોજના હેઠળ ખોલવામાં આવેલા બેંક ખાતાઓમાં શૂન્ય બેલેન્સ, મફત રૂપે કાર્ડ, અકસ્માત વીમો અને ઓવરડ્રાફ્ટ સુવિધાઓ આપવામાં આવે છે.

હિન્દુસ્થાન સમાચાર / પ્રજેશ શંકર / સુનિત નિગમ

હિન્દુસ્થાન સમાચાર / માધવી વ્યાસ