ભોપાલ, નવી દિલ્હી, 8 જૂન (હિ.સ.) મંગળવાર, 9 જૂનના રોજ મધ્યપ્રદેશના ઇન્દોરમાં બ્રિક્સ દેશોના કૃષિ કાર્યકારી જૂથ અને કૃષિ પ્રધાનોની એક મહત્વપૂર્ણ બેઠક શરૂ થઈ રહી છે. આ બેઠકમાં 20 દેશોના પ્રતિનિધિઓ ભાગ લેશે, જે 13 જૂન સુધી ચાલશે. ભારત આ વર્ષે બ્રિક્સનું અધ્યક્ષપદ સંભાળી રહ્યું છે.

કેન્દ્રીય કૃષિ પ્રધાન શિવરાજ સિંહ ચૌહાણે, સોમવારે મીડિયા સાથે વાત કરતા આ કાર્યક્રમની વિગતવાર રૂપરેખા શેર કરી. તેમણે જણાવ્યું હતું કે, નિર્ધારિત સમયપત્રક મુજબ, કૃષિ કાર્યકારી જૂથની બેઠકો 9 થી 11 જૂન દરમિયાન યોજાશે, ત્યારબાદ 12 થી 13 જૂને મુખ્ય કૃષિ પ્રધાનોની બેઠક યોજાશે. આ બેઠક દરમિયાન, ખોરાકના નુકસાનમાં ઘટાડો, પશુપાલન, મત્સ્યઉદ્યોગ અને ખેડૂતોના અધિકારો જેવા મહત્વપૂર્ણ વિષયો પર ચર્ચા કરવામાં આવશે.

કેન્દ્રીય કૃષિ પ્રધાને જણાવ્યું હતું કે, બ્રિક્સ 2006 માં શરૂ કરવામાં આવ્યું હતું અને આજે, 11 સભ્ય દેશો અને 10 ભાગીદાર દેશો સાથે, તે વિશ્વના સૌથી પ્રભાવશાળી જૂથોમાંનું એક બની ગયું છે. ભારતની અધ્યક્ષતામાં, બ્રિક્સ કૃષિ કાર્યકારી જૂથની અત્યાર સુધીમાં આશરે આઠ બેઠકો યોજાઈ છે. આ બેઠકોમાં ખાદ્ય સુરક્ષા, મત્સ્યઉદ્યોગ અને પશુપાલન સહિત અનેક મહત્વપૂર્ણ કૃષિ મુદ્દાઓ પર વિસ્તૃત ચર્ચા કરવામાં આવી છે.

તેમણે જણાવ્યું હતું કે, મધ્યપ્રદેશ માટે ખૂબ જ ગર્વ અને આનંદની વાત છે કે બ્રિક્સ દેશોના કૃષિ કાર્યકારી જૂથ અને કૃષિ પ્રધાનોની મહત્વપૂર્ણ બેઠક ઇન્દોરમાં યોજાઈ રહી છે. આ પરિષદ ખાસ છે કારણ કે, પ્રથમ વખત, આ બ્રિક્સ કૃષિ પ્રધાનોની બેઠક મંત્રી સ્તરે યોજાઈ રહી છે, જેમાં સભ્ય અને ભાગીદાર દેશો સહિત આશરે 20 દેશોના પ્રતિનિધિઓ ભાગ લઈ રહ્યા છે.

તેમણે જણાવ્યું હતું કે, આ જૂથ વૈશ્વિક દ્રષ્ટિકોણથી અત્યંત મહત્વપૂર્ણ છે, કારણ કે આ બ્રિક્સ દેશો વિશ્વની આશરે 42% કૃષિ જમીન, 68% કૃષિ હોલ્ડિંગ અને આશરે 42% ખાદ્ય ઉત્પાદન ધરાવે છે. આ પ્લેટફોર્મ પર સહયોગ વૈશ્વિક સ્તરે ખાદ્ય સુરક્ષાને અસર કરે છે. ભારતે અગાઉ 2012, 2016 અને 2021 માં બ્રિકસ ની અધ્યક્ષતા કરી હતી, જે દરમિયાન 2016 માં બ્રિકસ કૃષિ સંશોધન પ્લેટફોર્મ જેવી મોટી પહેલ શરૂ કરવામાં આવી હતી.

કેન્દ્રીય મંત્રી ચૌહાણે જણાવ્યું હતું કે, આ વર્ષના કાર્યક્રમમાં નાના અને સીમાંત ખેડૂતો આપણી બધી નીતિઓ અને સહયોગના કેન્દ્રમાં રહેશે. કૃષિ વિકાસનો સાચો અર્થ ત્યારે જ સાકાર થશે જ્યારે ખેડૂતોની આવક વધશે અને તેમની આજીવિકા સુરક્ષિત થશે. આ વર્ષે, ચાર મુખ્ય થીમ્સ પર વિશેષ ધ્યાન કેન્દ્રિત કરવામાં આવી રહ્યું છે: ખાદ્ય સુરક્ષા, પોષણ અને આજીવિકા; કૃષિ વેપાર અને સહકાર; આબોહવા અનુકૂલન અને ટકાઉ કૃષિ; અને કૃષિ અને ખાદ્ય પ્રણાલીઓમાં નવીનતા અને ભાગીદારીને મજબૂત બનાવવી.

આબોહવા પરિવર્તનના વૈશ્વિક પડકાર પર બોલતા તેમણે કહ્યું કે, નાના ખેડૂતોને પુનર્જીવિત કૃષિ, ટકાઉ પ્રથાઓ અને ડિજિટલ જાહેર માળખાગત સુવિધાઓ જેવી આધુનિક તકનીકો ઉપલબ્ધ કરાવવામાં આવી રહી છે, જ્યારે કૃષિના ભવિષ્યને ઉજ્જવળ બનાવવા માટે મહિલા અને યુવા નેતૃત્વને પ્રોત્સાહન આપવામાં આવી રહ્યું છે. આ સંદર્ભમાં, 12 જૂને નાના ખેડૂતો, મહિલાઓ અને યુવાનો દ્વારા ભાવિ ખાદ્ય સુરક્ષા પર એક ખાસ મંત્રી સ્તરીય સંવાદ પણ યોજાશે.

તેમણે માહિતી આપી હતી કે, કુદરત સાથે જોડાયેલી ભારતની સંસ્કૃતિને પ્રદર્શિત કરવા માટે, સભ્ય દેશોના મંત્રીઓ અને પ્રતિનિધિઓની ભાગીદારી સાથે આ ભવ્ય કાર્યક્રમ દરમિયાન એક ખાસ બ્રિકસ ગાર્ડન બનાવવામાં આવશે, અને પર્યાવરણ સંરક્ષણ પ્રત્યેની આપણી સહિયારી પ્રતિબદ્ધતાનું પ્રતીક, સામૂહિક વૃક્ષારોપણ કરવામાં આવશે. વધુમાં, ઇન્દોરની મુલાકાતે આવનારા વિદેશી મહેમાનોને ભારતના સમૃદ્ધ સાંસ્કૃતિક અને ઐતિહાસિક વારસામાં ડૂબકી લગાવવા માટે રજવાડા, છપ્પન દુકાન અને માંડુ જેવા ઐતિહાસિક અને પ્રખ્યાત સ્થળોની મુલાકાત કરાવવામાં આવશે. તેમણે વિશ્વાસ વ્યક્ત કર્યો કે ઇન્દોર બેઠક બ્રિકસ દેશો વચ્ચે કૃષિ સહયોગને નવી ઊંચાઈએ લઈ જશે અને વૈશ્વિક કાર્યસૂચિ પર લાખો નાના ખેડૂતોના હિતોને મજબૂત રીતે સ્થાપિત કરશે.

હિન્દુસ્થાન સમાચાર / મુકેશ તોમર / સત્યવાન / રામાનુજ શર્મા

હિન્દુસ્થાન સમાચાર / માધવી વ્યાસ