કાઠમંડુ, નવી દિલ્હી, 08 જૂન (હિ.સ.) નેપાળના વિદેશ મંત્રી શિશિર ખનાલ આવતા અઠવાડિયે ચીનની સત્તાવાર યાત્રા પર જવાના છે. ભારત પ્રવાસથી પાછા ફર્યા પછી તેમનો ચીન પ્રવાસ નક્કી કરવામાં આવ્યો છે.

વિદેશ મંત્રાલય દ્વારા આપવામાં આવેલી માહિતી અનુસાર, વિદેશ મંત્રી ખનાલ 14 જૂને ચીન માટે રવાના થશે. 15 અને 16 જૂને તેમના ઔપચારિક કાર્યક્રમો નિર્ધારિત છે. આ દરમિયાન તેમની ચીનના વિદેશ મંત્રી વાંગ યી અને ચીની કમ્યુનિસ્ટ પાર્ટીના વિદેશ વિભાગના પ્રમુખ લિયુ હૈશિંગ સાથે મુલાકાત થવાની યોજના છે.

પોતાના પ્રવાસ દરમિયાન, વિદેશ મંત્રી ખનાલ બીજિંગમાં નેપાળી પ્રવાસી સમુદાય સાથે પણ સંવાદ કરશે. તેમનો 17 જૂને નેપાળ પાછા ફરવાનો કાર્યક્રમ છે.

વિદેશ મંત્રીના ચીન પ્રવાસની તારીખ અને એજન્ડાને લઈને નેપાળના વિદેશ મંત્રાલય તરફથી સત્તાવાર ઘોષણા 12 જૂને કરવામાં આવશે.

વિદેશ મંત્રાલયના પ્રવક્તા લોકબહાદુર પૌડેલ ક્ષેત્રીયે જણાવ્યું કે, વિદેશ મંત્રીના ભારત યાત્રા પર વધુ ધ્યાન કેન્દ્રિત રહેવાને કારણે ચીન પ્રવાસની તૈયારીઓ પર વિસ્તૃત ચર્ચા થઈ શકી નથી. તેમણે જણાવ્યું, “અમે ચીની મિત્રો સાથે સતત સંપર્કમાં છીએ. જેવો કોઈ નવો વિકાસ થશે, અમે ઔપચારિક જાણકારી શેર કરીશું.”

વિદેશ મંત્રી ખનાલ, 5 જૂને ભારત યાત્રા પર ગયા હતા અને 7 જૂને કાઠમંડુ પાછા ફર્યા. ભારત પ્રવાસ દરમિયાન તેમણે ભારતના વિદેશ મંત્રી ડો. એસ. જયશંકર, રાષ્ટ્રીય સુરક્ષા સલાહકાર અજીત ડોભાલ તથા ભાજપ વિદેશ વિભાગના પ્રમુખ વિજય ચૌથાઈવાલે સહિત અનેક નેતાઓ સાથે મુલાકાત કરી હતી.

હિન્દુસ્થાન સમાચાર / પંકજ દાસ / વીરેન્દ્ર સિંહ

હિન્દુસ્થાન સમાચાર / ડો.હિતેશ એન.વ્યાસ