નવી દિલ્હી, 08 જૂન (હિ.સ.). ભારતીય દૂરસંચાર નિયામક પ્રાધિકરણ (ટ્રાઈ)એ, માર્ચમાં મેઘાલય અને એપ્રિલમાં પંજાબમાં મોબાઇલ નેટવર્કની ગુણવત્તાની તપાસ કરી. મેઘાલયના ઈસ્ટ અને વેસ્ટ જયંતિયા હિલ્સ જિલ્લાઓમાં તથા એનએચ-6 પર રથા ચેરે ખસિયા પુંજીથી જોવાઈ સુધી અને પંજાબના ચંદીગઢ, મોહાલી અને પંચકુલા શહેરી વિસ્તારમાં કરવામાં આવેલી તપાસમાં જિયો અને એરટેલે સરેરાશ સૌથી ઝડપી ડાઉનલોડ સ્પીડ નોંધાવી, જ્યારે બીએસએનએલ અને વોડાફોન-આઈડિયામાં કવરેજ ગેપ અને કોલ ડ્રોપની સમસ્યા વધુ રહી.

ટ્રાઈ અનુસાર, મેઘાલયમાં માર્ચ મહિનામાં 213 કિલોમીટર સિટી ડ્રાઈવ અને 98.9 કિલોમીટર હાઈવે ડ્રાઈવ દરમિયાન નેટવર્કની સ્થિતિનું પરીક્ષણ કરવામાં આવ્યું. અહીં કવરેજ ગેપ અને કોલ ડ્રોપની સમસ્યા મુખ્ય રહી. હાઈવે ડ્રાઈવમાં વોડાફોન-આઈડિયાના 12,887 સેમ્પલમાંથી 4,946માં સિગ્નલ નબળું જોવા મળ્યું, જ્યારે બીએસએનએલના 8,972 સેમ્પલમાંથી 2,719માં કવરેજનો અભાવ રહ્યો. સરેરાશ ડાઉનલોડ સ્પીડ એરટેલની 72.24 થી 88.50 એમબીપીએસ, જિયોની 97.89 થી 122.77 એમબીપીએસ, બીએસએનએલની 9.54 થી 4.37 એમબીપીએસ અને વોડાફોન-આઈડિયાની 25.45 થી 23.35 એમબીપીએસ રહી. અપલોડ સ્પીડમાં એરટેલે 14.50 થી 20.22 એમબીપીએસ અને જિયોએ 6.21 થી 5.64 એમબીપીએસ નોંધાવી, જ્યારે બીએસએનએલ અને વોડાફોન-આઈડિયાનું પ્રદર્શન પ્રમાણમાં નબળું રહ્યું. કોલ ડ્રોપ દરમાં બીએસએનએલ અને વોડાફોન-આઈડિયા સૌથી પાછળ રહ્યા, જ્યાં અનુક્રમે 34 અને 30 કોલ ડ્રોપ નોંધાયા.

પંજાબમાં એપ્રિલ દરમિયાન 453.2 કિલોમીટર સિટી ડ્રાઈવ, 15 હોટસ્પોટ અને 1.5 કિલોમીટર વોક ટેસ્ટ કરવામાં આવ્યો. આમાં એરટેલ અને જિયોએ અનુક્રમે 169.66 એમબીપીએસ અને 203.16 એમબીપીએસ સરેરાશ ડાઉનલોડ સ્પીડ નોંધાવી. વોડાફોન-આઈડિયાની સ્પીડ 48.27 એમબીપીએસ અને બીએસએનએલની માત્ર 11 એમબીપીએસ રહી. અપલોડ સ્પીડમાં એરટેલ 23.28 એમબીપીએસ, જિયો 23.85 એમબીપીએસ, વોડાફોન-આઈડિયા 17.97 એમબીપીએસ અને બીએસએનએલ 4.96 એમબીપીએસ પર રહ્યું. કોલ ડ્રોપ દરમાં એરટેલનું પ્રદર્શન સૌથી શ્રેષ્ઠ રહ્યું, જ્યાં એક પણ કોલ ડ્રોપ નોંધાયો નહીં, જ્યારે બીએસએનએલમાં 24 કોલ ડ્રોપ નોંધાયા. કોલ સાયલન્સ ઇન્સ્ટન્સમાં પણ એરટેલ અને જિયોનું પ્રદર્શન પ્રમાણમાં સારું રહ્યું.

મેઘાલયમાં એરટેલમાં સિટી ડ્રાઈવ દરમિયાન 27 વખત અને હાઈવે ડ્રાઈવમાં 8 વખત કોલ સાયલન્સ (કોલ દરમિયાન અવાજ જતો રહેવો) નોંધાયો. જિયોમાં અનુક્રમે 18 અને 6 વખત, જ્યારે બીએસએનએલમાં 10 અને 9 વખત તથા વોડાફોન-આઈડિયામાં 3 અને 2 વખત કોલ સાયલન્સ ઇન્સ્ટન્સ જોવા મળ્યા. અપલોડ સ્પીડમાં એરટેલે શહેરોમાં 14.50 એમબીપીએસ અને હાઈવેમાં 20.22 એમબીપીએસની સ્પીડ નોંધાવી. જિયોની અપલોડ સ્પીડ અનુક્રમે 6.21 અને 5.64 એમબીપીએસ રહી. બીએસએનએલની અપલોડ સ્પીડ 3.85 થી 2.31 એમબીપીએસ અને વોડાફોન-આઈડિયાની 4.81 થી 5.12 એમબીપીએસ રહી.

પંજાબની તપાસમાં એરટેલમાં 7, જિયોમાં 9, બીએસએનએલમાં 16 અને વોડાફોન-આઈડિયામાં 3 વખત કોલ સાયલન્સ નોંધાયા. અપલોડ સ્પીડમાં એરટેલ 23.28 એમબીપીએસ, જિયો 23.85 એમબીપીએસ, વોડાફોન-આઈડિયા 17.97 એમબીપીએસ અને બીએસએનએલ માત્ર 4.96 એમબીપીએસ પર રહ્યું. કવરેજ ગેપમાં એરટેલના 63,149 સેમ્પલમાંથી ફક્ત 97માં નબળો સિગ્નલ નોંધાયો, જ્યારે બીએસએનએલના 61,140 સેમ્પલમાંથી 7,755માં કવરેજનો અભાવ રહ્યો. જિયો અને વોડાફોન-આઈડિયામાં અનુક્રમે 356 અને 382 સેમ્પલ નબળા જોવા મળ્યા.

હિન્દુસ્થાન સમાચાર / માધવી વ્યાસ