નવી દિલ્હી, 24 જુલાઈ (હિ.સ.)ફિલ્મ સમીક્ષા: 'દુલ્હનિયા લે આયેગી' મનોરંજન અને પારિવારિક મૂલ્યોનું ઉત્તમ મિશ્રણ-

ફિલ્મ: 'દુલ્હનિયા લે આયેગી'

કલાકાર: ખુશાલી કુમાર, મહેશ માંજરેકર, પીયૂષ મિશ્રા, સ્નેહિલ દીક્ષિત, ઓમકાર કપૂર, અગૂ સ્ટેનલી

દિગ્દર્શક: આકાશા દિત્ય લામા

લેખક: જયંત ગુપ્તા, અનુપ્રિયા રોય

શૈલી: રોમેન્ટિક કોમેડી | પારિવારિક ડ્રામા

રેટિંગ: ⭐⭐⭐½ (3.5/5)

લગ્ન અને જાન પર આધારિત ફિલ્મો બોલિવૂડમાં પહેલા પણ ઘણી વાર બની ચૂકી છે, પરંતુ 'દુલ્હનિયા લે આયેગી' તેના અનોખા વિચારને કારણે અલગ ઓળખ બનાવે છે. અહીં વર જાન લઈને કન્યાના ઘરે નથી આવતો, પરંતુ કન્યા પોતે પોતાના માટે વર શોધવા નીકળી પડે છે. આ જ રસપ્રદ વિચાર સાથે ફિલ્મ હાસ્ય, ભાવનાઓ અને પારિવારિક સંબંધોનું સુંદર મિશ્રણ રજૂ કરે છે. દિગ્દર્શક આકાશા દિત્ય લામાએ એક હળવી-ફૂલકી પણ દિલને સ્પર્શી જાય તેવી વાર્તાને મનોરંજક શૈલીમાં મોટા પડદા પર ઉતારી છે.

**વાર્તા**

ફિલ્મની વાર્તા નવ્યા (ખુશાલી કુમાર) ની આસપાસ ફરે છે, જે એક મોટી કંપનીમાં માનવ સંસાધન વિભાગના વડા છે. તેના પિતા દેવી પ્રસાદ (મહેશ માંજરેકર) પોતાની દીકરીના લગ્નને લઈને ખૂબ ખુશ છે અને આખા પરિવારમાં લગ્નની તૈયારીઓ ચાલી રહી છે, પરંતુ લગ્ન પહેલા જ નવ્યાને તેના ભાવિ પતિની અસલિયત ખબર પડે છે. તેને જાણ થાય છે કે તેનો મંગેતર મહિલાઓનું સન્માન કરતો નથી અને તે દગાબાજ છે. આ પછી તે લગ્ન તોડવાનો નિર્ણય કરે છે.

જોકે, તેની સામે સૌથી મોટી ચિંતા તેના બીમાર પિતાની તબિયત હોય છે. તેમને આઘાત ન લાગે, તેથી નવ્યા એક એવો નિર્ણય લે છે, જેની કોઈ કલ્પના પણ કરી શકતું નથી. તે એ જ મંડપમાં લગ્ન કરવા માટે નવા વરની શોધ શરૂ કરી દે છે. આ સફરમાં તેને ઘણી વિચિત્ર, મજેદાર અને ભાવુક પરિસ્થિતિઓનો સામનો કરવો પડે છે. વાર્તા આગળ વધતા સંબંધો, વિશ્વાસ અને સાચો જીવનસાથી પસંદ કરવાના મહત્વને મનોરંજક શૈલીમાં રજૂ કરે છે.

**દિગ્દર્શન**

દિગ્દર્શક આકાશા દિત્ય લામાએ ફિલ્મને હળવા-ફૂલકા અંદાજમાં રજૂ કરી છે. તેમણે હાસ્ય અને ભાવનાઓ વચ્ચે સારું સંતુલન જાળવ્યું છે. ફિલ્મ ક્યાંય પણ જરૂર કરતાં વધારે ગંભીર થતી નથી અને ન તો પોતાની વાર્તાથી ભટકે છે. લેખક જયંત ગુપ્તા અને અનુપ્રિયા રોયે મધ્યમવર્ગીય પરિવારની ભાવનાઓ, લગ્નની તૈયારીઓ અને સંબંધોની ઉષ્માને સહજ રીતે પડદા પર ઉતારી છે. ઘણા દ્રશ્યો દર્શકોને ખુલ્લેઆમ હસાવે છે, જ્યારે કેટલાક પળો ભાવુક પણ કરી દે છે.

**અભિનય**

ખુશાલી કુમારે નવ્યાના પાત્રમાં આત્મવિશ્વાસ અને પરિપક્વતા દર્શાવી છે. ભાવનાત્મક અને હાસ્યજનક બંને પ્રકારના દ્રશ્યોમાં તેમનો અભિનય પ્રભાવ પાડે છે. મહેશ માંજરેકર એક સ્નેહાળ અને જવાબદાર પિતાના પાત્રમાં ખૂબ જ સ્વાભાવિક લાગ્યા છે. તેમના અને ખુશાલી વચ્ચેના ભાવનાત્મક દ્રશ્યો ફિલ્મની મોટી તાકાત બને છે. પીયૂષ મિશ્રા પોતાની ખાસ શૈલી અને સંવાદ અદાયગીથી મનોરંજન વધારે છે. જ્યારે સ્નેહિલ દીક્ષિત ફિલ્મનું સૌથી મોટું આશ્ચર્યજનક પેકેજ સાબિત થાય છે. તેમની શાનદાર હાસ્યજનક ટાઈમિંગ ઘણા દ્રશ્યોમાં હાસ્યના ઠહાકા પડાવે છે. ઓમકાર કપૂર અને અગૂ સ્ટેનલી પણ પોતાના પાત્રો સાથે ન્યાય કરે છે.

**તકનીકી પાસું**

ફિલ્મની સિનેમેટોગ્રાફી રંગીન અને આકર્ષક છે. લગ્નનું વાતાવરણ, સંગીત અને પારિવારિક માહોલને ખૂબસૂરતીથી ફિલ્માવવામાં આવ્યું છે. પૃષ્ઠભૂમિ સંગીત વાર્તા સાથે સુમેળ સાધે છે અને ફિલ્મની ગતિ પણ પૂરા સમય દરમિયાન જળવાઈ રહે છે. સંપાદન ચુસ્ત છે, જેનાથી ફિલ્મ ક્યાંય પણ બોજારૂપ લાગતી નથી.

**અંતિમ નિર્ણય**

'દુલ્હનિયા લે આયેગી' એક સ્વચ્છ પારિવારિક રોમેન્ટિક હાસ્ય ફિલ્મ છે, જે મનોરંજનની સાથે સંબંધોનું મહત્વ અને સાચા નિર્ણયો લેવાનો સંદેશ પણ આપે છે. ફિલ્મનો અનોખો વિષય, હળવું હાસ્ય, ભાવનાત્મક વાર્તા અને કલાકારોનો પ્રભાવશાળી અભિનય તેને એક મનોરંજક અનુભવ બનાવે છે. જો તમે પરિવાર સાથે એવી ફિલ્મ જોવા માંગો છો, જેમાં હાસ્ય, ભાવનાઓ અને દિલને સ્પર્શી જાય તેવા પળો હોય, તો 'દુલ્હનિયા લે આયેગી' આ સપ્તાહે તમારા માટે એક ઉત્તમ વિકલ્પ સાબિત થઈ શકે છે.

હિન્દુસ્થાન સમાચાર / લોકેશ ચંદ્ર દુબે / સુનીત નિગમ

હિન્દુસ્થાન સમાચાર / માધવી વ્યાસ