નવી દિલ્હી, 28 જુલાઈ (હિ.સ.) ભારતીય રેલવેએ નેટવર્ક ક્ષમતા વધારવા અને સંચાલન કાર્યક્ષમતા સુધારવાના ઉદ્દેશ્યથી દક્ષિણ મધ્ય રેલવેના નાંદેડ મંડળના પરભણી-મુદખેડ ડબલ લાઇન રેલખંડ પર ઇલેક્ટ્રિક ટ્રેક્શન પ્રણાલીના ઉન્નતીકરણને મંજૂરી આપી છે. 163 કરોડ રૂપિયાના ખર્ચે આ પ્રોજેક્ટ હેઠળ વિદ્યુત પુરવઠા સંબંધિત જરૂરી કાર્યો પણ કરવામાં આવશે.

રેલ મંત્રાલયે મંગળવારે જણાવ્યું કે, પ્રોજેક્ટ હેઠળ 164 ટ્રેક કિલોમીટર લાંબા રેલખંડ પર હાલની 1x25 કેવી ઇલેક્ટ્રિક ટ્રેક્શન પ્રણાલીને અત્યાધુનિક 2x25 કેવી પ્રણાલીમાં રૂપાંતરિત કરવામાં આવશે. આ સાથે જ વધેલા વિદ્યુત ભારને સંભાળવા માટે વીજ પુરવઠાના માળખાકીય સુવિધાઓને પણ સુદ્રઢ કરવામાં આવશે.

પરભણી-મુદખેડ રેલખંડ વ્યૂહાત્મક દૃષ્ટિએ મહત્વપૂર્ણ હાઇલી યુટિલાઇઝ્ડ નેટવર્ક (એચયુએન) રૂટ-9 નો ભાગ છે, જે અજમેર-ઇન્દોર-ખંડવા-અકોલા-પૂર્ણા-મુદખેડ-સિકંદરાબાદ-મહેબૂબનગર-ધોનેને જોડે છે.

મંત્રાલયના જણાવ્યા અનુસાર, ટ્રેક્શન પ્રણાલીના ઉન્નતીકરણથી રેલખંડ પર ટ્રેનોના સંચાલન માટે વધુ વિશ્વસનીય અને મજબૂત વિદ્યુત પુરવઠો સુનિશ્ચિત થશે. આનાથી માલસામાન વહન ક્ષમતામાં વધારો થશે અને વંદે ભારત એક્સપ્રેસ જેવી આધુનિક ટ્રેનોના સંચાલનને પણ વધુ સારો ટેકો મળશે.

રેલવેનું કહેવું છે કે, આ પ્રોજેક્ટ વર્ષ 2029-30 સુધીમાં 3,000 મિલિયન ટન માલસામાન વહનના લક્ષ્યને હાંસલ કરવાની દિશામાં પણ મહત્વપૂર્ણ યોગદાન આપશે. આ સાથે જ, આ ઉચ્ચ ઘનતાવાળા રેલ માર્ગો પર વિદ્યુત માળખાકીય સુવિધાઓના આધુનિકીકરણ અને સંચાલન કાર્યક્ષમતા વધારવાની ભારતીય રેલવેની સતત પહેલનો એક ભાગ છે.

હિન્દુસ્થાન સમાચાર / સુશીલ કુમાર / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ