દેહરાદૂન, નવી દિલ્હી, 28 જુલાઈ (હિ. સ.). ઉત્તરાખંડમાં ધોધમાર વરસાદે જનજીવનને વ્યાપકપણે પ્રભાવિત કર્યું છે. ચારધામ યાત્રા માર્ગો પર ભૂસ્ખલન અને ભારે વરસાદની ચેતવણીને ધ્યાનમાં રાખીને ચારધામ યાત્રાને બે દિવસ (28 અને 29 જુલાઈ) માટે રોકી દેવામાં આવી છે. ગઢવાલ કમિશનર આનંદ સ્વરૂપે જણાવ્યું કે ચારધામ યાત્રા માર્ગો પર અનેક સ્થળોએ થયેલા ભૂસ્ખલનને કારણે શ્રદ્ધાળુઓની સુરક્ષાને ધ્યાનમાં રાખીને 28 અને 29 જુલાઈ માટે ચારધામ યાત્રા સ્થગિત કરવામાં આવી છે. હવામાન અનુકૂળ બન્યા પછી અને માર્ગ સુરક્ષિત થયા પછી યાત્રા ફરી શરૂ કરવામાં આવશે. પ્રશાસને શ્રદ્ધાળુઓને નિર્ધારિત સમયગાળા સુધી યાત્રા પર ન નીકળવા અને ફક્ત સત્તાવાર સૂચનાઓ પર ભરોસો કરવા અપીલ કરી છે.

હવામાન વિજ્ઞાન કેન્દ્ર, દેહરાદૂન અનુસાર, રાજ્યમાં આગામી બે દિવસ સુધી ઘણા જિલ્લાઓમાં ભારેથી અતિભારે વરસાદ અને કેટલાક સ્થળોએ અત્યંત તીવ્ર વરસાદનો દોર ચાલુ રહેવાની સંભાવના છે. મંગળવારે ઉત્તરકાશી, દેહરાદૂન, ટિહરી, રુદ્રપ્રયાગ, ચમોલી, પૌડી, હરિદ્વાર, નૈનીતાલ, બાગેશ્વર અને પિથોરાગઢ જિલ્લાઓ માટે ભારેથી અતિભારે વરસાદ, આકાશી વીજળી અને તીવ્ર વરસાદની ચેતવણી જાહેર કરવામાં આવી છે. 29 જુલાઈએ પણ ઉત્તરકાશી, દેહરાદૂન, ટિહરી, રુદ્રપ્રયાગ, ચમોલી, નૈનીતાલ અને બાગેશ્વરમાં આવી જ સ્થિતિ યથાવત રહેવાનો અંદાજ છે.

કેન્દ્રએ ચેતવણી આપી છે કે, સતત વરસાદને કારણે ભૂસ્ખલન, પથ્થરો પડવા, રાષ્ટ્રીય અને રાજ્ય ધોરીમાર્ગો અવરોધિત થવા, નદીઓ અને ગદેરાના જળસ્તરમાં અચાનક વધારો, નીચાણવાળા વિસ્તારોમાં જળભરાવો અને વીજળી અને પીવાના પાણીની સેવાઓ પ્રભાવિત થવાની આશંકા યથાવત છે. લોકોને નદી-નાળાની નજીક ન જવા અને પર્વતીય વિસ્તારોની યાત્રા ફક્ત અત્યંત આવશ્યક હોય ત્યારે જ કરવાની સલાહ આપવામાં આવી છે.

છેલ્લા 24 કલાક દરમિયાન દેહરાદૂન જિલ્લાના માલદેવતામાં સૌથી વધુ 233 મિલીમીટર (મિમી) વરસાદ નોંધાયો. હાથીબડકલામાં 194.5 મિમી, જૌલીગ્રાન્ટમાં 172.2 મિમી, મસૂરીમાં 163 મિમી, ઉખીમઠમાં 120 મિમી, ડીડીહાટમાં 102 મિમી, મોહકમપુરમાં 95.8 મિમી, ધનોલ્ટીમાં 88 મિમી, હલ્દ્વાની અને થલમાં 83-83 મિમી, ચમોલીમાં 80.6 મિમી, તેજમમાં 73 મિમી, બેરીનાગમાં 72 મિમી, કીર્તિનગરમાં 70 મિમી તથા નરેન્દ્રનગરમાં 63 મિમી વરસાદ રેકોર્ડ કરવામાં આવ્યો.

દેહરાદૂનમાં નંદાની ચોકી પાસે પુલિયાનું માળખું સુરક્ષિત છે. ભારે વરસાદને કારણે એપ્રોચ રોડ (પહોંચ માર્ગ) નીચેની માટી ધોવાઈ જવાથી રસ્તાનો ભાગ ધસી ગયો છે, જેનું યુદ્ધના ધોરણે સમારકામ કરવામાં આવી રહ્યું છે. જિલ્લા મેજિસ્ટ્રેટ ડો. આશિષ ચૌહાણે સ્થળનું નિરીક્ષણ કરીને અધિકારીઓને ત્રણ કલાકની અંદર માર્ગ પુનઃસ્થાપિત કરવા નિર્દેશ આપ્યા. તેમણે માલદેવતા, સોડા સરોલી અને સહસ્ત્રધારા વિસ્તારમાં પણ ક્ષતિગ્રસ્ત રસ્તાઓ અને સુરક્ષા દિવાલોનું નિરીક્ષણ કરીને રાહત અને પુનર્વસન કાર્યોમાં ઝડપ લાવવા નિર્દેશ આપ્યા.

હિન્દુસ્થાન સમાચાર / રાજેશ કુમાર પાંડેય / મુકુંદ

હિન્દુસ્થાન સમાચાર / ડો.હિતેશ એન.વ્યાસ