ગ્લાસગો, નવી દિલ્હી, 29 જુલાઈ (હિ.સ.). ભારતીય દોડવીર ગુલવીર સિંહે, કોમનવેલ્થ ગેમ્સ 2026માં ઇતિહાસ રચતા મંગળવારે પુરુષોની 10,000 મીટર દોડમાં રજત પદક પોતાના નામે કર્યો. આ સાથે જ તેઓ આ સ્પર્ધામાં પદક જીતનારા પ્રથમ ભારતીય પુરુષ એથ્લીટ બન્યા. તેમણે 27 મિનિટ 49.78 સેકન્ડનો સમય કાઢીને આ સિદ્ધિ હાંસલ કરી.

આ કોમનવેલ્થ ગેમ્સની પુરુષ 10,000 મીટર સ્પર્ધામાં ભારતનો પ્રથમ પદક છે. વળી, પુરુષ અને મહિલા બંને વર્ગોને ભેગા કરીને આ સ્પર્ધામાં ભારતને 16 વર્ષ પછી પદક મળ્યો છે. આ પહેલાં દિલ્હી 2010 કોમનવેલ્થ ગેમ્સમાં કવિતા રાઉતે મહિલા 10,000 મીટર દોડમાં કાંસ્ય પદક જીત્યો હતો.

દોડની શરૂઆતમાં રાષ્ટ્રીય રેકોર્ડધારક ગુલવીર સિંહ ટોચના દોડવીરો સાથે રહ્યા. 4,000 મીટર સુધી તેઓ ત્રીજા સ્થાને હતા, પરંતુ અડધી દૂરી પૂરી થતાં સુધીમાં છઠ્ઠા સ્થાને સરકી ગયા. આ પછી તેમણે શાનદાર વાપસી કરતા 6,000 અને 7,000 મીટર સુધી પાંચમું સ્થાન હાંસલ કર્યું. 8,000 મીટર પર તેઓ ફરી છઠ્ઠા સ્થાને પહોંચ્યા, પરંતુ અંતિમ એક કિલોમીટર બાકી રહેતા ચોથા સ્થાને આવી ગયા.

છેલ્લા તબક્કામાં ગુલવીર સિંહે જબરદસ્ત ગતિ બતાવી. તેમણે અંતિમ એક કિલોમીટરની દૂરી 2 મિનિટ 29.2 સેકન્ડમાં પૂરી કરતા પોતાના પ્રતિસ્પર્ધીઓને પાછળ છોડી દીધા અને રજત પદક પર કબજો જમાવ્યો.

ઓસ્ટ્રેલિયાના કાઈ રોબિન્સને 27 મિનિટ 48.93 સેકન્ડના સમય સાથે સુવર્ણ પદક જીત્યો, જ્યારે આઇલ ઓફ મેનના ડેવિડ મુલાર્કીએ 27 મિનિટ 50.28 સેકન્ડ સાથે કાંસ્ય પદક હાંસલ કર્યો. સુવર્ણ અને રજત વચ્ચે ફક્ત 0.85 સેકન્ડ તથા રજત અને કાંસ્ય વચ્ચે માત્ર 0.50 સેકન્ડનો તફાવત રહ્યો.

ગુલવીર સિંહનું આ પ્રદર્શન ભારતીય લાંબા અંતરની દોડના ઇતિહાસમાં એક નવી સિદ્ધિ તરીકે નોંધાઈ ગયું છે અને તેમણે કોમનવેલ્થ ગેમ્સની 10,000 મીટર સ્પર્ધામાં ભારતના 16 વર્ષના પદક માટેના ઇંતજારનો પણ અંત લાવ્યો છે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / ડો.હિતેશ એન.વ્યાસ