ગૌહાટી, નવી દિલ્હી, 31 જુલાઈ (હિ.સ.). આસામમાં પૂરની ભયાનકતાની કરુણ કહાણી શિવસાગર જિલ્લામાં સૌથી વધુ જોવા મળી રહી છે. ઘણા ગામોની હાલત એવી થઈ ગઈ છે, જ્યાં આખા ગામમાં કમર સુધી માટીનો કાંપ ભરાયેલો છે. આવી જ સ્થિતિ ઘરોની અંદર પણ છે. પૂરમાં ઘણા પરિવારોના લોકો ગુમ થઈ ગયા છે, જેમનો કોઈ પત્તો નથી. જોકે, આવા લોકોનો હજુ સુધી સત્તાવાર રીતે કોઈ માહિતી સામે આવી નથી. તેમ છતાં નદીઓનું પાણી હવે ઓસરવા લાગ્યું છે, જેના કારણે હવે લોકો નવી રીતથી જીવન જીવવા માટે સંઘર્ષ કરી રહ્યા છે.

પૂરથી સૌથી વધુ પ્રભાવિત ઉપલા આસામના ચાર જિલ્લાઓ શિવસાગર, ચરાઈદેવ, જોરહાટ અને ગોલાઘાટ છે, જ્યાં સરકારી અને ખાનગી સ્તરે રાહત અને બચાવ કાર્ય ચાલી રહ્યું છે. તેમ છતાં લોકો પોતાના ઘરોમાં જઈ શકતા નથી. પૂરે બધું જ તબાહ કરી દીધું છે. આસામ રાજ્ય આપત્તિ વ્યવસ્થાપન પ્રાધિકરણ (એએસડીએમએ) દ્વારા 30 જુલાઈએ જાહેર કરાયેલા આંકડા અનુસાર ધનસિરી નદી (નુમલીગઢ) ભયજનક સપાટીથી ઉપર વહી રહી છે. આ દરમિયાન શિવસાગર જિલ્લામાં બે લોકોના મૃતદેહ મળી આવ્યા છે. આમ રાજ્યમાં મૃતકોની કુલ સંખ્યા 80 થઈ ગઈ છે.

પૂરથી વર્તમાન સમયમાં કુલ આઠ જિલ્લાઓ હજુ પણ ખરાબ રીતે પ્રભાવિત છે. આમાં ગોલાઘાટ, શિવસાગર, બિસ્વનાથ, ચરાઈદેવ, કામરૂપ (મેટ્રો), જોરહાટ, ધેમાજી અને નગાંવ જિલ્લાઓનો સમાવેશ થાય છે. આ જિલ્લાઓના 21 મહેસૂલી મંડળોના કુલ 437 ગામો પ્રભાવિત છે. રાજ્યની કુલ 2,12,441 વસ્તી હજુ પણ પ્રભાવિત છે અને 17,198.09 હેક્ટર કૃષિ ભૂમિ પાણીમાં ડૂબેલી છે. સરકારે પૂર પ્રભાવિત લોકો માટે વર્તમાનમાં કુલ 62 રાહત શિબિરો અને 50 રાહત વિતરણ કેન્દ્રો સહિત કુલ 112 શિબિરો કાર્યરત રાખ્યા છે. રાહત શિબિરોમાં 13,294 લોકોએ આશ્રય લીધો છે. જ્યારે રાહત વિતરણ કેન્દ્રો પર 62,289 બિન-શિબિર નિવાસીઓ રાહત મેળવી રહ્યા છે.

પૂર રાહત અને બચાવ અભિયાનમાં એસડીઆરએફ, સેના/અર્ધલશ્કરી દળ, એનડીઆરએફ, ડીડીઆરએફ, વાયુસેના, પોલીસ, અગ્નિશમન અને કટોકટી સેવાઓ (એફ એન્ડ ઇએસ), સર્કલ કાર્યાલય/સ્થાનિક પ્રશાસન, નાગરિક સુરક્ષા/તાલીમબદ્ધ સ્વયંસેવકો અને અગ્નિશમન વિભાગ જોડાયેલા છે. આ દરમિયાન પૂર પ્રભાવિત વિસ્તારોમાં રાજ્ય સરકારે કુલ 94 મેડિકલ ટીમોને તૈનાત કરી. આ સમયગાળા દરમિયાન 26 બોટ પણ રાહત કાર્યમાં લાગેલી રહી. પૂરથી મોટા પાયે રસ્તાઓ, પુલ અને અન્ય માળખાકીય સુવિધાઓને નુકસાન થયું છે.

હિન્દુસ્થાન સમાચાર / અરવિન્દ રાય / મુકુન્દ

હિન્દુસ્થાન સમાચાર / ડો.હિતેશ એન.વ્યાસ