કચ્છ, 14 ઓગસ્ટ (હિ.સ.) ભુજ શહેરમાં સ્વાતંત્ર્ય દિવસની ઉજવણીનો માહોલ અત્યારથી જ જોવા મળી રહ્યો છે. 15 ઓગસ્ટની પૂર્વસંધ્યાએ શહેરના વિવિધ વિસ્તારોમાં કરવામાં આવેલા રોશનીના શણગારે સમગ્ર ભુજને આકર્ષક રંગત આપી છે. શહેરના મુખ્ય સર્કલ, ચાર રસ્તા તેમજ મહત્વની સરકારી ઇમારતોને રંગબેરંગી સિરીઝ લાઇટથી સજાવવામાં આવતા રાત્રિના સમયે ભુજનું દૃશ્ય મનમોહક બની રહ્યું છે.

સ્વાતંત્ર્ય દિવસને લઈને શહેરમાં કરવામાં આવેલા ડેકોરેશનમાં દેશભક્તિની લાગણી સાથે ઉત્સવનો માહોલ પણ જોવા મળી રહ્યો છે. કચ્છ કલેક્ટર કચેરીની ઇમારત સહિત ભુજ એ ડિવિઝન પોલીસ સ્ટેશન અને શહેરના વિવિધ મહત્વના સ્થળો રોશનીથી ઝળહળી ઉઠ્યા છે. ખાસ કરીને જયુબેલી સર્કલ અને ઓલ્ફ્રેડ હાઇસ્કૂલ સર્કલ સહિતના વિસ્તારોમાં લાઇટિંગ લોકોનું ધ્યાન ખેંચી રહી છે.

સાંજ પડતાની સાથે જ વિવિધ સ્થળોએ રોશની પ્રગટાવવામાં આવતા શહેરનું વાતાવરણ વધુ જીવંત બની જાય છે. પરિવાર સાથે શહેરમાં નીકળતા નાગરિકો પણ આ સુંદર શણગાર નિહાળવા માટે વિવિધ સર્કલ અને મુખ્ય માર્ગો પર થોભતા જોવા મળી રહ્યા છે. રોશનીથી સજાવાયેલા સ્થળોએ લોકો પોતાના મોબાઇલ કેમેરામાં યાદગાર પળોને કેદ કરી રહ્યા છે.

દેશના 80મા સ્વાતંત્ર્ય દિવસની ઉજવણીને લઈને ભુજ સહિત સમગ્ર કચ્છમાં ઉત્સાહનો માહોલ છે. રાષ્ટ્રીય પર્વની ઉજવણીમાં લોકોની ભાગીદારી વધે અને શહેરમાં દેશભક્તિની ભાવના વધુ પ્રબળ બને તેવા વાતાવરણનું નિર્માણ થયું છે.

ભુજની શેરીઓ અને મુખ્ય માર્ગો પર ઝળહળતી રોશની માત્ર શહેરની સુંદરતામાં વધારો કરતી નથી, પરંતુ સ્વાતંત્ર્ય દિવસના પર્વને લઈને લોકોના ઉત્સાહ અને રાષ્ટ્રીય ભાવનાને પણ ઉજાગર કરે છે. 15 ઓગસ્ટના દિવસે ધ્વજવંદન અને વિવિધ કાર્યક્રમો સાથે જ્યારે દેશભક્તિનો માહોલ ચરમસીમાએ પહોંચશે, ત્યારે આ રોશનીથી સજાયેલું ભુજ શહેર પણ રાષ્ટ્રીય પર્વની ઉજવણીમાં પોતાની આગવી રંગત ઉમેરશે.

હિન્દુસ્થાન સમાચાર / Rohit Ramjibhai Padhiyar