ઢાકા (બાંગ્લાદેશ), નવી દિલ્હી, 03 ઓગસ્ટ (હિ.સ.). બાંગ્લાદેશ ઉચ્ચ ન્યાયાલયે દેશના અગ્રણી અને યુવા હિન્દુ સંત ચિન્મય કૃષ્ણ દાસ બ્રહ્મચારીને ચારમાંથી બે કેસમાં જામીન મંજૂર કર્યા. બ્રહ્મચારી લગભગ 20 મહિનાથી જેલમાં બંધ છે. તેમની ધરપકડ પર ભારત સહિત અનેક દેશોએ સખત વિરોધ નોંધાવ્યો છે.

ચિન્મયના વકીલ અપૂર્વ કુમાર ભટ્ટાચાર્યએ જામીન મળ્યાની પુષ્ટિ કરી. ભટ્ટાચાર્યએ જણાવ્યું કે, ચિન્મય વિરુદ્ધ કુલ છ કેસ નોંધાયેલા છે. અત્યાર સુધીમાં ચાર કેસમાં જામીન મળી ચૂક્યા છે.

ઢાકા ટ્રિબ્યુન અખબારના અહેવાલ મુજબ, ઉચ્ચ ન્યાયાલયના ન્યાયમૂર્તિ કે.એમ. ઝાહિદ સરવર અને ન્યાયમૂર્તિ શેખ અબુ તાહિરની ખંડપીઠે રવિવારે મોડી સાંજે જામીનનો આદેશ પસાર કર્યો. વકીલ અપૂર્વ કુમાર ભટ્ટાચાર્યએ જણાવ્યું કે જોકે, તેમને તાત્કાલિક ન્યાયિક કસ્ટડીમાંથી મુક્ત કરવામાં આવશે નહીં, કારણ કે તેમને હજુ બે કેસમાં જામીન મળ્યા નથી.

ભટ્ટાચાર્યએ જણાવ્યું કે, તેમના અસીલ હિન્દુ સંત ચિન્મય વિરુદ્ધ છ કેસ નોંધવામાં આવ્યા છે. આમાંથી ચટગાંવમાં વકીલ સૈફુલ ઇસ્લામના મૃત્યુ સાથે સંકળાયેલા હત્યાના કેસમાં સુનાવણી ચાલી રહી છે.

તેમણે કહ્યું કે, આ ઉપરાંત રાષ્ટ્રીય ધ્વજના કથિત અપમાનને લઈને નોંધાયેલા રાજદ્રોહના કેસમાં ચિન્મયના જામીન પર ઉચ્ચ ન્યાયાલયનો સ્થગન આદેશ લાગુ છે. જે બે કેસમાં જામીનની રાહ જોવાઈ રહી છે, તેમની અરજીઓ પર સુનાવણી 16 ઓગસ્ટે થવાની છે.

ચિન્મય બ્રહ્મચારીને 25 નવેમ્બર, 2024 ના રોજ ઢાકામાં રાષ્ટ્રીય ધ્વજના કથિત અપમાનને લઈને નોંધાયેલા રાજદ્રોહના કેસમાં ધરપકડ કરવામાં આવી હતી. ત્યારથી તેઓ જેલના સળિયા પાછળ છે.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ