નવી દિલ્હી, 03 ઓગસ્ટ (હિ.સ.) ભારતીય દૂરસંચાર વિનિયામક પ્રાધિકરણ (ટ્રાઈ) એ દેશમાં મોબાઇલ વૉઇસ કૉલની ગુણવત્તા સુધારવા અને ગ્રાહકોની સીધી ભાગીદારી સુનિશ્ચિત કરવાના ઉદ્દેશ્યથી સોમવારે 'ટ્રાઈ માય કૉલ' મોબાઇલ એપનું, નવીનીકૃત સંસ્કરણ લોન્ચ કર્યું. નવી એપ દ્વારા મોબાઇલ ગ્રાહકો દરેક વૉઇસ કૉલ પછી તેની ગુણવત્તાને એકથી પાંચ સ્ટાર સુધી રેટિંગ આપી શકશે અને કૉલ ડ્રોપ, અવાજ તૂટવો, ઑડિયોમાં વિલંબ, ક્રોસ કનેક્શન તથા કૉલ કનેક્ટ થવામાં વધુ પડતો સમય લાગવા જેવી સમસ્યાઓની સીધી જાણકારી નોંધાવી શકશે.

ટ્રાઈના અધ્યક્ષ અનિલ કુમાર લાહોટીએ એપ લોન્ચ કરતા કહ્યું કે, જોકે તેને નવીનીકૃત સંસ્કરણ કહેવામાં આવી રહ્યું છે, પરંતુ વ્યવહારિક રીતે આ સંપૂર્ણપણે નવી અને વ્યાપક પ્રણાલી છે. આ એપનો ઉદ્દેશ્ય ગ્રાહકોને સ્વૈચ્છિક રીતે પોતાના વૉઇસ કૉલ અનુભવનું મૂલ્યાંકન કરવાની સરળ વ્યવસ્થા ઉપલબ્ધ કરાવવાનો છે. ગ્રાહકો કૉલ સમાપ્ત થતા જ આવતા પૉપ-અપ દ્વારા અથવા સીધા એપમાં જઈને પોતાની રેટિંગ નોંધાવી શકે છે અને નેટવર્ક સંબંધિત સમસ્યાઓની જાણકારી શેર કરી શકે છે.

તેમણે કહ્યું કે, નવી એપમાં ગ્રાહકો પોતાના જૂના ફીડબેકનો રેકોર્ડ પણ જોઈ શકશે અને પોતે નેટવર્ક કવરેજ પરીક્ષણ પણ કરી શકશે. ગ્રાહકો પાસેથી પ્રાપ્ત આંકડા દૂરસંચાર સેવા પ્રદાતાઓને પોતાના નેટવર્કનો લક્ષિત સુધારા કરવામાં મદદ કરશે, જ્યારે ટ્રાઈ આ આંકડાઓનો ઉપયોગ પોતાની સેવા ગુણવત્તા નિગરાની પ્રણાલીને વધુ પ્રભાવી બનાવવા માટે કરશે.

ટ્રાઈની નવ વર્ષ જૂની 'માય કૉલ' એપમાં આધુનિક સ્માર્ટફોન, ખાસ કરીને એન્ડ્રોઇડ-12 અને તેનાથી ઉપરના સંસ્કરણો સાથે તકનીકી અનુકૂળતા સંબંધિત સમસ્યાઓ સામે આવી રહી હતી. આ જ કારણોસર એપને સંપૂર્ણપણે નવું સ્વરૂપ આપવામાં આવ્યું છે. આમાં 'ભાષિણી' પ્લેટફોર્મથી બહુભાષી સુવિધા પણ ઉમેરવામાં આવી છે, જેથી વિવિધ ભારતીય ભાષાઓના ગ્રાહકો સરળતાથી તેનો ઉપયોગ કરી શકશે.

નવી એપમાં ગ્રાહકો કોઈપણ વૉઇસ કૉલને એકથી પાંચ સ્ટાર સુધી રેટિંગ આપી શકશે. જો કૉલ ગુણવત્તા ત્રણ સ્ટાર કે તેનાથી ઓછી નોંધવામાં આવે છે તો ગ્રાહકો કૉલ ડ્રોપ, અવાજ કપાવો, ઇકો, ઑડિયોમાં વિલંબ, ક્રોસ કનેક્શન, એક તરફથી અવાજ ન આવવો અથવા કૉલ કનેક્ટ થવામાં વધુ સમય લાગવા જેવી વિશિષ્ટ સમસ્યાઓ પસંદ કરી શકશે.

એપમાં નેટવર્ક કવરેજ પરીક્ષણની સુવિધા પણ આપવામાં આવી છે, જેથી ગ્રાહકો પોતાના સ્થાન પર ઉપલબ્ધ સિગ્નલની વાસ્તવિક સ્થિતિ તથા પ્રયુક્ત નેટવર્ક ટેકનોલોજી, જેમ કે 4G કે 5G, ની જાણકારી મેળવી શકશે. આ ઉપરાંત ઇન્ટરેક્ટિવ નકશા પર સ્થાનવાર પોતાની પૂર્વ રેટિંગ અને નેટવર્ક સંબંધિત જાણકારી પણ જોઈ શકશે.

હિન્દુસ્થાન સમાચાર / પ્રશાંત શેખર / પવન કુમાર

હિન્દુસ્થાન સમાચાર / માધવી વ્યાસ