અમૃતસર, નવી દિલ્હી, 30 ઓગસ્ટ (હિ.સ.). અમૃતસર એરપોર્ટ પર રવિવારે સવારે સ્પાઈસજેટની અમૃતસરથી દુબઈ જતી ફ્લાઇટ લગભગ 18 કલાક મોડી પડવાને કારણે મુસાફરોએ ભારે હંગામો કર્યો. મુસાફરો ટિકિટ કાઉન્ટર પર એરલાઇનના કર્મચારીઓ સાથે દલીલ કરતા જોવા મળ્યા અને સ્પાઈસજેટ વિરુદ્ધ સૂત્રોચ્ચાર પણ કર્યા.

મુસાફરોના જણાવ્યા અનુસાર, ફ્લાઇટનો નિર્ધારિત સમય સવારે 8:40 વાગ્યે હતો, પરંતુ ફ્લાઇટ ન આવતા પહેલા તેનો સમય વધારીને સવારે 11 વાગ્યે કરવામાં આવ્યો. ત્યારબાદ મુસાફરોને જણાવવામાં આવ્યું કે, ફ્લાઇટ રાત્રે લગભગ 2:30 વાગ્યે રવાના થઈ શકે છે. જોકે, મુસાફરોનું કહેવું છે કે આ સમય પણ પાકો જણાવવામાં આવ્યો ન હતો. ફ્લાઇટમાં વિલંબને કારણે ઘણા મુસાફરો પોતાના બાળકો સાથે એરપોર્ટ પર કલાકો સુધી રાહ જોતા રહ્યા. ફ્લાઇટમાં વિલંબથી લગભગ 300 મુસાફરો પ્રભાવિત થયા છે. આમાં લગભગ 40 ટકા મહિલાઓ અને 60 ટકા પુરુષોનો સમાવેશ થાય છે.

મુસાફરોના જણાવ્યા અનુસાર, તેમણે સ્પાઈસજેટ પાસેથી હોટેલ કે રૂમની વ્યવસ્થા કરવાની માંગ કરી, પરંતુ તેમના મતે એરલાઇન દ્વારા કોઈ યોગ્ય વ્યવસ્થા કરવામાં આવી ન હતી. ઘણા મુસાફરોના સંબંધીઓ પણ તેમને લેવા માટે એરપોર્ટ પહોંચી ગયા હતા, પરંતુ ફ્લાઇટના સમય અંગે સ્પષ્ટ માહિતી ન મળવાને કારણે તેઓ પણ પરેશાન રહ્યા. મુસાફરોએ આરોપ લગાવ્યો કે એરલાઇન દ્વારા ફ્લાઇટ મોડી પડવાનું સ્પષ્ટ કારણ જણાવવામાં આવી રહ્યું નથી. આ ઉપરાંત, રિફંડ, વૈકલ્પિક ટિકિટ કે રહેવાની વ્યવસ્થા અંગે પણ તેમને સ્પષ્ટ માહિતી આપવામાં આવી રહી નથી.

મુસાફરોએ માંગ કરી કે, ફ્લાઇટમાં વિલંબનું સ્પષ્ટ કારણ જણાવવામાં આવે અને નિયમો અનુસાર રિફંડ કે વૈકલ્પિક યાત્રાની સુવિધા સાથે તેમને જરૂરી મૂળભૂત સુવિધાઓ પૂરી પાડવામાં આવે.

હિન્દુસ્થાન સમાચાર / ગુરુશરણ સિંહ / સુનીત નિગમ

હિન્દુસ્થાન સમાચાર / માધવી વ્યાસ