નવી દિલ્હી, 30 ઓગસ્ટ (હિ.સ.). નાણા મંત્રાલય, પશ્ચિમ એશિયા સંકટ અને વધતી વૈશ્વિક અનિશ્ચિતતાઓ તથા ખાદ્ય અને ઇંધણની ઊંચી કિંમતો વચ્ચે, 12 ઓક્ટોબરથી નાણાકીય વર્ષ 2027-28ના કેન્દ્રીય બજેટની તૈયારી શરૂ કરશે.

નાણા મંત્રાલયના આર્થિક બાબતોના વિભાગ દ્વારા જારી કરાયેલા બજેટ પરિપત્રમાં જણાવાયું છે કે, ખર્ચ સચિવની અધ્યક્ષતામાં બજેટ-પૂર્વ બેઠકો 12 ઓક્ટોબરથી શરૂ થશે. નાણાકીય સલાહકારો સુનિશ્ચિત કરશે કે 6 ઓક્ટોબર સુધીમાં અથવા તે પહેલાં કેન્દ્રીય બજેટ માહિતી પ્રણાલી (યુબીઆઈએસ) માં જરૂરી માહિતી યોગ્ય રીતે દાખલ કરવામાં આવે. બજેટ પરિપત્ર મુજબ, આગામી નાણાકીય વર્ષ 2027-28ના કેન્દ્રીય બજેટમાં આર્થિક વૃદ્ધિને વેગ આપવા માટે સુધારાઓને આગળ વધારવા અને રોજગાર સર્જન તથા ઘરેલું માંગ વધારવાના ઉપાયો પર ધ્યાન કેન્દ્રિત કરવામાં આવે તેવી અપેક્ષા છે. બજેટ પૂર્વ બેઠકો નવેમ્બરના મધ્ય સુધી ચાલુ રહેશે.

પરિપત્રમાં જણાવાયું છે કે, નિર્ધારિત ફોર્મેટમાં ડેટાની નકલો પણ ચકાસણી માટે જમા કરાવવી પડશે. પરિપત્રમાં જણાવાયું છે કે, બજેટ-પૂર્વ બેઠકો પૂર્ણ થયા પછી 2027-28ના બજેટ અંદાજ અને 2026-27ના સુધારેલા અંદાજને કામચલાઉ ધોરણે અંતિમ સ્વરૂપ આપવામાં આવશે. પરિપત્રમાં જણાવાયું છે કે, બજેટ-પૂર્વ બેઠકોમાં વિસ્તૃત ચર્ચા પછી મંત્રાલયો અને વિભાગોને પ્રારંભિક ખર્ચ મર્યાદાની જાણ કરવામાં આવશે. સરકારની ખર્ચ પ્રાથમિકતાઓ અને મહેસૂલ અંદાજને ધ્યાનમાં રાખીને અંતિમ ખર્ચ મર્યાદા મંત્રાલય દ્વારા નક્કી કરવામાં આવશે.

વડાપ્રધાન નરેન્દ્ર મોદીના ત્રીજા કાર્યકાળવાળી સરકારનું આ ચોથું બજેટ છે અને નાણા મંત્રી નિર્મલા સીતારમણનું સતત 10મું કેન્દ્રીય બજેટ હશે, જેને તેઓ 1 ફેબ્રુઆરીએ લોકસભાના પટલ પર રજૂ કરશે.

હિન્દુસ્થાન સમાચાર / પ્રજેશ શંકર / સુનિત નિગમ

હિન્દુસ્થાન સમાચાર / માધવી વ્યાસ