નવી દિલ્હી, 31 ઓગસ્ટ (હિ.સ.) કન્નડ સુપરસ્ટાર યશની ફિલ્મ 'ટોક્સિક એ, ફેરી ટેલ ફોર ગ્રોન-અપ્સ'એ બોક્સ ઓફિસ પર પોતાની મજબૂત પકડ બનાવી લીધી છે. ગીતૂ મોહનદાસના દિગ્દર્શનમાં બનેલી આ એક્શન-થ્રિલરને વીકએન્ડનો પૂરતો લાભ મળ્યો અને ફિલ્મે ભારતીય બોક્સ ઓફિસ પર 200 કરોડ રૂપિયાના ક્લબમાં પ્રવેશ કરી લીધો. જોકે, ફિલ્મને હિંસક દૃશ્યો અને મહિલાઓના ચિત્રણને લઈને સતત ટીકા સહન કરવી પડી રહી છે, પરંતુ તેનો વીકએન્ડની ટિકિટ વિન્ડો આવક પર ખાસ અસર જોવા મળી નથી અને સિનેમાઘરોમાં દર્શકોની ભીડ ઉમટી પડી.

સેકનિલ્ક મુજબ, 'ટોક્સિક'એ રિલીઝના પાંચમા દિવસે એટલે કે રવિવારે 23 કરોડ રૂપિયાનું નેટ કલેક્શન કર્યું. આ કમાણી 16,241 શો દરમિયાન 25.3 ટકા ઓક્યુપન્સી સાથે થઈ. ફિલ્મે પહેલા દિવસે 101.10 કરોડ, બીજા દિવસે 37.65 કરોડ, ત્રીજા દિવસે 27.20 કરોડ અને ચોથા દિવસે 25.15 કરોડ રૂપિયા કમાયા હતા. આ રીતે પાંચ દિવસમાં ફિલ્મનું ભારતમાં કુલ નેટ કલેક્શન 214.10 કરોડ રૂપિયા થઈ ગયું છે, જ્યારે વર્લ્ડવાઇડ ગ્રોસ કલેક્શન 285.20 કરોડ રૂપિયા સુધી પહોંચી ગયું છે. ફિલ્મે થલાપતિ વિજયની 'જન નાયકન' અને સૂર્યાની 'કરુપ્પુ'ના લાઇફટાઇમ કલેક્શનને પણ પાછળ છોડી દીધું છે.

તેમ છતાં, યશની અગાઉની ફિલ્મ 'કેજીએફ: ચેપ્ટર 2'ની સરખામણીમાં 'ટોક્સિક'ની શરૂઆત ઘણી નબળી રહી છે. 'કેજીએફ 2'એ શરૂઆતના પાંચ દિવસમાં ભારતમાં 430.15 કરોડ રૂપિયાનું નેટ કલેક્શન કર્યું હતું. લગભગ 500 કરોડ રૂપિયાના મોટા બજેટમાં બનેલી 'ટોક્સિક' માટે હવે આગળની કમાણી અત્યંત મહત્વપૂર્ણ રહેશે. ફિલ્મને પોતાની કિંમત વસૂલ કરવા અને નફાની દિશામાં આગળ વધવા માટે બોક્સ ઓફિસ પર ગતિ જાળવી રાખવી પડશે. આ અઠવાડિયે 'મિરઝાપુર: ધ મૂવી'ના સિનેમાઘરોમાં આવવાથી 'ટોક્સિક'ને નવી પડકારજનક સ્થિતિનો સામનો કરવો પડી શકે છે.

હિન્દુસ્થાન સમાચાર / લોકેશ ચંદ્ર દુબે / રામાનુજ શર્મા

હિન્દુસ્થાન સમાચાર / માધવી વ્યાસ