કચ્છ, 09 ઓગસ્ટ (હિ.સ.) : ગાંધીધામ શહેરમાં વાહનચોરીના બનાવો પર નિયંત્રણ મેળવવા પોલીસ દ્વારા હાથ ધરવામાં આવતી પેટ્રોલિંગ અને બાતમી આધારિત કાર્યવાહીમાં વધુ એક સફળતા મળી છે. ગાંધીધામ “બી” ડિવિઝન પોલીસે નંબર પ્લેટ વગરની શંકાસ્પદ મોટરસાઇકલ સાથે એક યુવકને ઝડપી પાડ્યો હતો. પોલીસની પૂછપરછ દરમિયાન આ મોટરસાઇકલ કચ્છ આર્કેડના પાર્કિંગ વિસ્તારમાંથી આશરે દસ દિવસ અગાઉ ચોરી કરવામાં આવી હોવાનું સામે આવતાં પોલીસે વાહન કબજે કરી આગળની તપાસ શરૂ કરી છે.

ગેરકાયદેસર પ્રવૃત્તિઓને અટકાવવા માટે સરહદી રેન્જ ભુજના પોલીસ મહાનિરીક્ષક ચિરાગ કોરડિયા તથા પૂર્વ કચ્છ ગાંધીધામના પોલીસ અધિક્ષક સાગર બાગમાર દ્વારા સ્થાનિક પોલીસને સતત સતર્ક રહી કાર્યવાહી કરવા સૂચનાઓ આપવામાં આવી છે. આ માર્ગદર્શન હેઠળ અંજાર વિભાગના નાયબ પોલીસ અધિક્ષક મુકેશ ચૌધરીની દેખરેખમાં ગાંધીધામ “બી” ડિવિઝન પોલીસ સ્ટેશનના પોલીસ ઇન્સ્પેક્ટર એસ.વી. ગોજીયાની સૂચનાથી સર્વેલન્સ સ્ટાફ દ્વારા વિસ્તારમાં સઘન પેટ્રોલિંગ હાથ ધરવામાં આવી રહ્યું હતું.

પેટ્રોલિંગ દરમિયાન પોલીસને મળેલી ચોક્કસ બાતમીના આધારે ગળપાદર પુલથી મચ્છુનગર તરફ જતા માર્ગ નજીક શંકાસ્પદ રીતે એક મોટરસાઇકલ લઇને પસાર થતા ઇસમને અટકાવવામાં આવ્યો હતો. મોટરસાઇકલ પર નંબર પ્લેટ ન હોવાથી પોલીસને શંકા જતાં યુવકની પૂછપરછ કરવામાં આવી હતી. તપાસ દરમિયાન તેની પાસેથી એચ.એફ. ડિલેક્ષ મોટરસાઇકલ મળી આવી હતી.

પોલીસે યુવકની વધુ પૂછપરછ કરતાં તેણે આ મોટરસાઇકલ આશરે દસ દિવસ અગાઉ કચ્છ આર્કેડના પાર્કિંગમાંથી ચોરી કરી હોવાની કબૂલાત કરી હોવાનું પોલીસ દ્વારા જણાવાયું છે. ત્યારબાદ પોલીસે મોટરસાઇકલને કબજામાં લઇ તેની વિગતોની ચકાસણી હાથ ધરી હતી. જપ્ત કરાયેલ મોટરસાઇકલની કિંમત અંદાજે રૂ.40 હજાર હોવાનું જાણવા મળ્યું છે.

આ કાર્યવાહી દરમિયાન ગાંધીધામ બી ડિવિઝન પોલીસે સચીન રમેશભાઇ રાઠોડ, ઉંમર 23 વર્ષ, રહે. મારૂતીનગર, મેઘપર બોરીચી, અંજારને ઝડપી પાડ્યો છે. તેની પાસેથી એન્જિન નંબર HATTERMSH50340 ધરાવતી એચ.એફ. ડિલેક્ષ મોટરસાઇકલ કબજે કરવામાં આવી છે.

આ મામલે પોલીસે ભારતીય નાગરિક સુરક્ષા સંહિતા-2023ની કલમ 35(2)(ઇ) તથા 106 હેઠળ કાર્યવાહી કરી છે અને મોટરસાઇકલ ચોરીના બનાવ અંગે વધુ તપાસ હાથ ધરી છે. આરોપીએ વાહન ક્યાંથી ચોર્યું હતું, ચોરીમાં અન્ય કોઇ વ્યક્તિની સંડોવણી છે કે કેમ તથા અગાઉ પણ આવા બનાવોને અંજામ આપવામાં આવ્યો છે કે કેમ તે સહિતના મુદ્દાઓ અંગે પોલીસ તપાસ આગળ વધારી રહી છે.

ગાંધીધામ “બી” ડિવિઝન પોલીસની આ કામગીરીમાં પોલીસ ઇન્સ્પેક્ટર એસ.વી. ગોજીયાના માર્ગદર્શન હેઠળ સર્વેલન્સ સ્ટાફના કર્મચારીઓ જોડાયા હતા. પેટ્રોલિંગ દરમિયાન મળેલી બાતમીના આધારે થયેલી આ કાર્યવાહીથી વાહનચોરીના ગુનાનો ભેદ ઉકેલવામાં પોલીસને મહત્વની સફળતા મળી હોવાનું માનવામાં આવી રહ્યું છે.

---------------

હિન્દુસ્થાન સમાચાર / Rohit Ramjibhai Padhiyar