નવી દિલ્હી, 10 સપ્ટેમ્બર (હિ.સ.). ઈરાન અને અમેરિકા વચ્ચે સતત વધી રહેલા તણાવ અને ક્રૂડ ઓઈલની કિંમતમાં થયેલા વધારાને કારણે વૈશ્વિક બજારમાં આજે પણ ચોતરફી દબાણ યથાવત છે. અમેરિકી બજાર પાછલા સત્ર દરમિયાન સતત ત્રીજા દિવસે ઘટાડા સાથે બંધ થયા. જોકે, ડાઉ જોન્સ ફ્યુચર્સ આજે મજબૂતી સાથે કારોબાર કરતું જોવા મળી રહ્યું છે. યુરોપિયન બજારમાં પણ પાછલા સત્ર દરમિયાન સતત વેચવાલીનું દબાણ રહ્યું. આ જ રીતે એશિયન બજારમાં પણ આજે ઘટાડાનો માહોલ જોવા મળી રહ્યો છે.

પશ્ચિમ એશિયાના તણાવ અને ઈરાન દ્વારા અમેરિકી ઠેકાણાઓ પર વધુ તેજ હુમલો કરવાની ચેતવણી આપ્યા બાદ અમેરિકી બજારમાં પાછલા સત્ર દરમિયાન ગભરાટનો માહોલ રહ્યો. ડાઉ જોન્સ ઇન્ડસ્ટ્રિયલ એવરેજ 400 અંકના ઘટાડાનો ભોગ બન્યો. આ જ રીતે એસ એન્ડ પી 500 ઇન્ડેક્સે 0.48 ટકાની નબળાઈ સાથે 7,636.36 અંકના સ્તરે પાછલા સત્રના કારોબારનો અંત કર્યો. આ ઉપરાંત નાસ્ડેક 168.07 અંક એટલે કે 0.64 ટકા તૂટીને 26,253.34 અંકના સ્તરે બંધ થયો. જોકે, ડાઉ જોન્સ ફ્યુચર્સ આજે હાલમાં 197.67 અંક એટલે કે 0.38 ટકાની મજબૂતી સાથે 52,578.33 અંકના સ્તરે કારોબાર કરતું જોવા મળી રહ્યું છે.

યુરોપિયન બજારમાં પાછલા સત્ર દરમિયાન સતત વેચવાલી થતી રહી. એફટીએસઈ ઇન્ડેક્સ 141.60 અંક એટલે કે 1.33 ટકાની નબળાઈ સાથે 10,670.06 અંકના સ્તરે બંધ થયો. આ જ રીતે સીએસી ઇન્ડેક્સે 161.31 અંક એટલે કે 1.98 ટકાના ઘટાડા સાથે 8,156.67 અંકના સ્તરે પાછલા સત્રના કારોબારનો અંત કર્યો. આ ઉપરાંત ડીએએક્સ ઇન્ડેક્સ 431.18 અંક એટલે કે 1.69 ટકા ગગડીને 25,576.45 અંકના સ્તરે બંધ થયો.

એશિયન બજારમાં પણ આજે વેચવાલીનું દબાણ યથાવત છે. એશિયાના નવ બજારમાંથી આઠના સૂચકાંકો નબળાઈ સાથે લાલ નિશાનમાં કારોબાર કરી રહ્યા છે, જ્યારે એક સૂચકાંક નજીવી તેજી સાથે લીલા નિશાનમાં જોવા મળી રહ્યો છે. એશિયન બજારમાં એકમાત્ર ગિફ્ટ નિફ્ટી 0.06 ટકાની તેજી સાથે 23,504.50 અંકના સ્તરે કારોબાર કરી રહ્યો છે.

બીજી તરફ, નિક્કેઈ ઇન્ડેક્સ 413.78 અંક એટલે કે 0.64 ટકાના ઘટાડા સાથે 64,729 અંકના સ્તરે આવી ગયો છે. આ જ રીતે સ્ટ્રેટ્સ ટાઈમ્સ ઇન્ડેક્સ 0.65 ટકા ગગડીને 5,692.63 અંકના સ્તરે પહોંચ્યો છે. હેંગ સેંગ ઇન્ડેક્સમાં આજે મોટો ઘટાડો નોંધાયો છે. હાલમાં આ સૂચકાંક 351.96 અંક એટલે કે 1.41 ટકા તૂટીને 24,923 અંકના સ્તરે કારોબાર કરી રહ્યો છે.

તાઈવાન વેટેડ ઇન્ડેક્સ પર પણ આજે દબાણ યથાવત છે. હાલમાં આ સૂચકાંક 357.33 અંક એટલે કે 0.76 ટકા ગગડીને 46,826.03 અંકના સ્તર સુધી ઘટી ગયો છે. આ જ રીતે કોસ્પી ઇન્ડેક્સ 0.72 ટકાની નબળાઈ સાથે 7,001.22 અંકના સ્તરે આવી ગયો છે. આ ઉપરાંત શાંઘાઈ કમ્પોઝિટ ઇન્ડેક્સ 0.35 ટકા ગગડીને 3,937.78 અંકના સ્તરે, સેટ કમ્પોઝિટ ઇન્ડેક્સ 0.06 ટકા તૂટીને 1,616.87 અંકના સ્તરે અને જકાર્તા કમ્પોઝિટ ઇન્ડેક્સ 0.05 ટકાના ઘટાડા સાથે 6,674.67 અંકના સ્તરે કારોબાર કરી રહ્યા છે.

હિન્દુસ્થાન સમાચાર / યોગિતા પાઠક / વીરેન્દ્ર સિંહ

હિન્દુસ્થાન સમાચાર / માધવી વ્યાસ