કાઠમંડુ, નવી દિલ્હી, 10 સપ્ટેમ્બર (હિ.સ.). નેપાળે આબોહવા પરિવર્તનને કારણે રસુવામાં આવેલા વિનાશક પૂરથી થયેલા નુકસાનના વળતર તરીકે આશરે 2 કરોડ અમેરિકી ડોલરની માંગ કરી છે.

નેપાળે ગયા અઠવાડિયે સંયુક્ત રાષ્ટ્ર આબોહવા પરિવર્તન માળખા હેઠળ રચાયેલા લોસ એન્ડ ડેમેજને પ્રતિસાદ આપવા માટેના ભંડોળ (નુકસાન અને ક્ષતિ ભંડોળ) ને આ સંબંધમાં પત્ર મોકલ્યો હતો.

આ પત્ર પર નાણાં પ્રધાન ડો. સ્વર્ણિમ વાગ્લે અને પર્યાવરણ પ્રધાન ગીતા ચૌધરીએ હસ્તાક્ષર કર્યા છે. વિદેશ પ્રધાન શિશિર ખનાલે એક પોડકાસ્ટમાં જણાવ્યું કે નેપાળે ભંડોળમાંથી 2 કરોડ અમેરિકી ડોલરની રકમની માંગ કરી છે.

એક પોડકાસ્ટ મુલાકાતમાં વિદેશ પ્રધાન ખનાલે કહ્યું, હાલમાં અમે 20 મિલિયન ડોલરના વળતરનો દાવો કર્યો છે. આ માત્ર પ્રારંભિક માંગ છે. આપત્તિ પછી નુકસાનનું વિગતવાર આકલન કરીને અમે સંપૂર્ણ સ્થિતિ દુનિયા સમક્ષ રજૂ કરીશું.

નેપાળ દુનિયાના એવા દેશોમાં શામેલ છે, જ્યાં ગ્રીનહાઉસ વાયુઓનું ઉત્સર્જન ખૂબ ઓછું છે. નિષ્ણાતોનું કહેવું છે કે, નેપાળને માત્ર પૂરથી થયેલા નુકસાન માટે જ નહીં, પરંતુ આબોહવા સંતુલનમાં તેના યોગદાનને ધ્યાનમાં રાખીને પણ આ ભંડોળમાંથી સહાય મળવી જોઈએ.

નુકસાન અને ક્ષતિ ભંડોળ સંબંધિત નિર્ણયો તેનો આંતરરાષ્ટ્રીય બોર્ડ લે છે. પર્યાવરણવિદોના મતે, રસુવા પૂરથી થયેલા નુકસાન અને આબોહવા પરિવર્તનમાં નેપાળના અત્યંત ઓછા યોગદાન – આ બંને પાસાઓને ધ્યાનમાં રાખીને નેપાળને આ ભંડોળમાંથી સહાય મળવામાં કોઈ અવરોધ ન હોવો જોઈએ.

ઉલ્લેખનીય છે કે, 26 ઓગસ્ટના રોજ રસુવાની ભોટેકોશી નદીમાં આવેલા વિનાશક પૂરે મોટા પાયે જાનમાલનું નુકસાન કર્યું હતું.

હિન્દુસ્થાન સમાચાર / પંકજ દાસ / વીરેન્દ્ર સિંહ

હિન્દુસ્થાન સમાચાર / ડો.હિતેશ એન.વ્યાસ