નવી દિલ્હી, 12 સપ્ટેમ્બર (હિ.સ.). ચાઇના સધર્ન એરલાઇન્સે ચીનના રાષ્ટ્રપતિ શી જિનપિંગના ભારત પ્રવાસ વચ્ચે છ વર્ષના લાંબા અંતરાલ પછી 21 સપ્ટેમ્બરથી ગ્વાંગઝુ-નવી દિલ્હી માર્ગ પર નિયમિત યાત્રી ફ્લાઇટ સેવાને ફરી શરૂ કરવાની જાહેરાત કરી છે.

એરલાઇન દ્વારા શનિવારે આ જાહેરાત એવા સમયે કરવામાં આવી, જ્યારે ચીનના રાષ્ટ્રપતિ શી જિનપિંગ 18મા બ્રિક્સ શિખર સંમેલનમાં ભાગ લેવા માટે ભારતના પ્રવાસે છે. કંપનીએ જણાવ્યું કે, આ સેવા ફરી શરૂ થવા સાથે તે દક્ષિણ એશિયામાં આઠ માર્ગો પર દર અઠવાડિયે 100 થી વધુ ફ્લાઇટ્સનું સંચાલન કરશે. ચીનના દક્ષિણ ગ્વાંગડોંગ પ્રાંતની રાજધાની ગ્વાંગઝુમાં મુખ્યાલય ધરાવતી ચાઇના સધર્ન એરલાઇન્સ ચીનમાં સ્થિત મુખ્ય એરલાઇન કંપનીઓમાંથી એક છે.

ભારત અને ચીન વચ્ચેની ફ્લાઇટ સેવાઓ 2020 માં, કોરોના એટલે કે કોવિડ-19 મહામારી પછી સ્થગિત કરી દેવામાં આવી હતી. ત્યારબાદ પૂર્વ લદ્દાખમાં બંને દેશો વચ્ચે ચાર વર્ષથી વધુ સમય સુધી ચાલેલા સૈન્ય ગતિરોધ વચ્ચે પણ આ સેવાઓ ફરી શરૂ કરવામાં આવી ન હતી. આ ગતિરોધ ગયા વર્ષે ઓક્ટોબરમાં સમાપ્ત થયો હતો. ચાઇના સધર્ન એરલાઇન્સની ફ્લાઇટ સેવાઓ ફરી શરૂ થવી એ ભારત-ચીન સંબંધોમાં ધીમે ધીમે થઈ રહેલા સામાન્યકરણનો એક ભાગ છે. સંબંધોમાં સુધારા વચ્ચે વડાપ્રધાન નરેન્દ્ર મોદી અને ચીનના રાષ્ટ્રપતિ શી જિનપિંગ વચ્ચે 2024 અને 2025માં બે મહત્વપૂર્ણ બેઠકો થઈ હતી.

હિન્દુસ્થાન સમાચાર / પ્રજેશ શંકર / સુનીત નિગમ

હિન્દુસ્થાન સમાચાર / ડો.હિતેશ એન.વ્યાસ