દુબઈ, નવી દિલ્હી, 14 સપ્ટેમ્બર (હિ.સ.). મહિલા એશિયા કપ 2026ની ફાઇનલ પછી ટ્રોફી વિતરણને લઈને ઉભા થયેલા વિવાદ પર ભારતીય મહિલા ક્રિકેટ ટીમના મુખ્ય કોચ અમોલ મઝુમદારે કહ્યું કે, આ મામલે બીસીસીઆઈ એ જે વલણ અપનાવ્યું છે, ટીમ તેની સાથે છે.

ભારતે રવિવારે શ્રીલંકાને 72 રનથી હરાવીને રેકોર્ડ આઠમી વખત મહિલા એશિયા કપનો ખિતાબ જીત્યો. આ પછી, હરમનપ્રીત કૌરની આગેવાની હેઠળની ભારતીય ટીમે એશિયન ક્રિકેટ કાઉન્સિલના પ્રમુખ મોહસિન નકવી પાસેથી ટ્રોફી લેવાનો ઇનકાર કર્યો. નકવી પાકિસ્તાન સરકારમાં પણ સામેલ છે.

આ ઘટનાક્રમ ગયા વર્ષના પુરુષ એશિયા કપ ફાઇનલની યાદ અપાવે છે. ત્યારે સૂર્યકુમાર યાદવની કપ્તાની હેઠળની ભારતીય ટીમે પાકિસ્તાનને ફાઇનલમાં હરાવ્યા પછી નકવી પાસેથી ટ્રોફી લેવાનો ઇનકાર કર્યો હતો.

મેચ પછી આયોજિત પ્રેસ કોન્ફરન્સમાં મઝુમદારે કહ્યું, “આ વલણ બીસીસીઆઈ એ અપનાવ્યું છે અને અમે તેની સાથે છીએ. અમારા માટે આ ટુર્નામેન્ટ સમાપ્ત થઈ ગઈ છે. અમે ચેમ્પિયન છીએ.”

તેમણે આગળ કહ્યું, “મોટા બોર્ડ પર લખેલું હતું કે, ભારત એશિયા કપ 2026નો ચેમ્પિયન છે. અમારા માટે આ ટુર્નામેન્ટ સત્તાવાર રીતે સમાપ્ત થઈ ગઈ છે. હવે અમારું ધ્યાન એશિયન ગેમ્સ પર છે.”

ભારતે ફાઇનલમાં શ્રીલંકાને 72 રનથી હરાવીને મહિલા એશિયા કપનો આઠમો ખિતાબ પોતાના નામે કર્યો અને હવે ટીમનો આગામી લક્ષ્ય એશિયન ગેમ્સમાં મજબૂત પ્રદર્શન કરવાનું છે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / ડો.હિતેશ એન.વ્યાસ