નવી દિલ્હી, 15 સપ્ટેમ્બર (હિ.સ.). તહેવારોની સિઝનની શરૂઆત સાથે જ ઈ-કોમર્સ ક્ષેત્રમાં રોજગારની મોટી તકો ઊભી થઈ રહી છે. ઓનલાઈન શોપિંગની વધતી માંગને ધ્યાનમાં રાખીને ફ્લિપકાર્ટે દેશભરમાં 2.50 લાખથી વધુ રોજગારની તકો તૈયાર કરવાની જાહેરાત કરી છે. આમાં ગિગ વર્કર્સ પણ સામેલ છે.

કંપનીએ મંગળવારે જાહેર કરેલા નિવેદનમાં જણાવ્યું કે, ઈ-કોમર્સ પ્લેટફોર્મ ફ્લિપકાર્ટે આગામી તહેવારો પહેલાં વધતી માંગને પૂરી કરવા માટે દેશભરમાં 2.5 લાખથી વધુ પ્રત્યક્ષ અને પરોક્ષ રોજગારની તકો ઊભી કરી છે. આમાંથી લગભગ 75 હજાર રોજગારની તકો એવા લોકો માટે છે, જેઓ પહેલીવાર નોકરી કરવા જઈ રહ્યા છે. આ કુલ તકોના લગભગ 30 ટકા છે. આ ભરતી અભિયાન દેશભરમાં 7 હજારથી વધુ ઈ-કાર્ટ કેન્દ્રોમાં ચલાવવામાં આવી રહ્યું છે.

ફ્લિપકાર્ટે જણાવ્યું કે, આ તકો દેશભરમાં 7,000થી વધુ ઈ-કાર્ટ સેન્ટર્સમાં ઉપલબ્ધ છે, જેમાં ફુલફિલમેન્ટ સેન્ટર્સ, સોર્ટેશન હબ્સ અને લાસ્ટ-માઇલ ડિલિવરી ઑપરેશન્સ પણ સામેલ છે. તહેવારો માટે 900થી વધુ નવા ડિલિવરી હબ્સ અને લગભગ 1.4 લાખ વધારાની લાસ્ટ-માઇલ રોજગારની તકો સાથે ફ્લિપકાર્ટ 'બિગ બિલિયન ડેઝ' પહેલાં ગ્રાહકોની વધતી માંગને પૂરી કરવા માટે તેના ડિલિવરી નેટવર્કનો ઝડપથી વિસ્તાર કરી રહ્યું છે.

કંપનીના જણાવ્યા અનુસાર, આ સિઝનમાં ઊભી કરાયેલી નવી નોકરીઓમાંથી 60 ટકા લાસ્ટ-માઇલ સાથે સંકળાયેલી છે, જે 'ફ્લિપકાર્ટ મિનિટ્સ'ના વિસ્તરણ અને ટિયર 2 અને ટિયર 3 ના માર્કેટ્સમાં વધતી માંગ દર્શાવે છે. આ વિસ્તરણથી ફ્લિપકાર્ટની સપ્લાય ચેઇનમાં મહિલાઓ અને દિવ્યાંગ લોકો માટે પણ વધુ તકો ઊભી થઈ રહી છે. હવે સપ્લાય ચેઇનના કામોમાં મહિલાઓની ભાગીદારી 20 ટકાથી વધુ છે, જ્યારે વેરહાઉસ અને ડિલિવરી ઑપરેશન્સમાં દિવ્યાંગ લોકોની ભાગીદારી પણ વધી છે.

ફ્લિપકાર્ટ જૂથના ચીફ કોર્પોરેટ અફેર્સ ઓફિસર રજનીશ કુમારે પોતાના નિવેદનમાં જણાવ્યું કે, મોટા પાયે કોમર્સથી મોટા પાયે તકો ઊભી થાય છે, પછી ભલે તે નોકરી હોય, આજીવિકા હોય કે એન્ટરપ્રેન્યોરશિપ. તેમણે કહ્યું કે, આ તહેવારોની સિઝનમાં ફ્લિપકાર્ટ દ્વારા પહેલીવાર કામની દુનિયામાં આવનારા લગભગ 75,000 લોકો તે જ મોટા ઇકોસિસ્ટમનો ભાગ છે.

હિન્દુસ્થાન સમાચાર / પ્રજેશ શંકર / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ