મુંબઈ, નવી દિલ્હી, 16 સપ્ટેમ્બર (હિ.સ.). મહારાષ્ટ્રના થાણે જિલ્લામાં મુંબઈ-નાસિક હાઈવે પર અટગાંવ પાસે બુધવારે ટ્રક અને કાર વચ્ચે થયેલી ટક્કરમાં ચાર લોકોના મોત થયા છે, જ્યારે સાત લોકો ઘાયલ થયા છે. તમામ ઘાયલોને શાહપુર જિલ્લા ઉપ હોસ્પિટલમાં દાખલ કરવામાં આવ્યા છે. આ ઘટનાની ઊંડાણપૂર્વક તપાસ શાહપુર પોલીસ સ્ટેશનની ટીમ કરી રહી છે.

પોલીસ અધિકારીએ જણાવ્યું કે, આ ઘટનાનો ભોગ બનેલા તમામ લોકો મુંબઈના જોગેશ્વરી વિસ્તારના રહેવાસી હતા. તેઓ ત્ર્યંબકેશ્વરમાં ભગવાનના દર્શન અને પૂજા-અર્ચના કર્યા બાદ બુધવારે મુંબઈ પરત ફરી રહ્યા હતા. આ દરમિયાન અટગાંવ પાસે તેમની કાર રસ્તા કિનારે ઉભેલા એક ટ્રક સાથે અથડાઈ હતી. પોલીસે કારમાં ફસાયેલા લોકોને બહાર કાઢ્યા અને શાહપુર ઉપજિલ્લા હોસ્પિટલ પહોંચાડ્યા, જ્યાં ડોકટરોએ ચાર લોકોને મૃત જાહેર કર્યા. મૃતકોની ઓળખ શ્રીરામ જયસ્વાલ, આયુષ જયસ્વાલ, લાડો જયસ્વાલ અને સૂરજ જયસ્વાલ તરીકે કરવામાં આવી છે, જ્યારે ઘાયલોની ઓળખ શુભી જયસ્વાલ, શિવમ જયસ્વાલ, હશિક જયસ્વાલ, સુનીતા જયસ્વાલ, રાધિકા જયસ્વાલ, સતીશ જયસ્વાલ અને સંતરામ જયસ્વાલ તરીકે કરવામાં આવી છે. આ મામલે શાહપુર પોલીસ સ્ટેશનમાં અકસ્માતનો રિપોર્ટ નોંધવામાં આવ્યો છે. પોલીસ અકસ્માતના કારણોની તપાસ કરી રહી છે.

હિન્દુસ્થાન સમાચાર / રાજબહાદુર યાદવ / વીરેન્દ્ર સિંહ

હિન્દુસ્થાન સમાચાર / માધવી વ્યાસ